عمرو محمود ياسين يتحدث عن مرض زوجته آيات أباظة: عشنا تفاصيل مرعبة
تحدث السيناريست عمرو محمود ياسين عن مرض زوجته الإعلامية آيات أباظة، مشيرًا إلى أنهما مرا بفترة صعبة للغاية.
تجربة العلاج
وقال عمرو محمود ياسين في لقائه مع الإعلامي أحمد سالم ببرنامج كلمة أخيرة عبر قناة ON: “خضنا تجربة علاج السنة اللي فاتت بأدوية وجراحة وخلصنا واحتفلنا ببشائر الشفاء ودخلت اشتغل وننسى اللي كان، وبعد ما المسلسل خلص، بنعمل فحص اتضح فيه مشاكل وبدأنا رحلة علاج جديدة، يمكن الكلام ده سهل، لكن التفاصيل صعبة جدًا”.
تفاصيل مرهقة
وأضاف عمرو محمود ياسين متأثرًا: “وأنت رايح تعمل الفحص مش عاوزين نسمع إلا كلمة واحد كله تمام، لكن الدكتور بيقولك لسه النتيجة، وبفضل قاعد كل الوقت ده في حالة رعب حقيقي، اللحظة اللي بيجي فيها نيتجة الفحص بشوفه ولاقي فيه مشكلة وهي تسألني إيه الأخبار بعيش تفاصيل صعبة، هي مش متخيلة أن فيه حاجة، وعلشان أقول وأشرح صعبة جدًا، التفاصيل مرهقة.. الناس بتسأل إيه الأخبار وإحنا بنعرفهم، لكن الليالي دي بتعدي ازاي من ألم وتعب وإرهاق”.
وأكمل:"عرفت آيات من أولى ثانوي وقرأنا فاتحة بعد ثانوية عامة وتالتة جامعة اتخطبنا ورابعة اتجوزنا، من هنا تيجي صعوبة التجربة، لأنها عاشت معايا أكتر ما عاشت مع أهلها".
