بتول الحداد تشيد بحلقة حمو بيكا مع أبلة فاهيتا: "مبهجة بشكل مش طبيعي"
أشادت الفنانة بتول الحداد بحلقة مطرب المهرجانات حمو بيكا مع شخصية الدمية الشهيرة أبلة فاهيتا في برنامج ليلة فونطاستيك، واصفة الحلقة بأنها “مبهجة بشكل مش طبيعي” عبر منشور على حسابها الرسمي بموقع إنستجرام.
وقالت الحداد: “جماعة حلقة حمو بيكا ومراته العسل مع أبلة فاهيتا حلوة جدًا ومبهجة، بجد طيبين أوي وهو جميل ما شاء اللّٰه، ربنا يحميهم. شوفو بجد هتضحكوا وهتتبسطوا أوي”.
كواليس حياة حمو بيكا
خلال الحلقة، كشف حمو بيكا عن طريقة تعارفه على زوجته، قائلاً: “اتعرفت على مراتي بعد ما جيبت المرسيدس وهي شافت كل حاجة حلوة، والدتي هي اللي اتعرفت عليها، وأول ما شوفتها قولتلها عايز أتجوزها. أنا رومانسي بس بطريقتي مش بجيب دباديب، هي مش بتحبها، لكنها بتحب الشوكولاتة.”
وتحدث عن بناته، مضيفًا: “البنات حنينين وطيبين، وربنا كتب لي إن خلفتي تبقى بنات وأنا راضي، وهم طالعين شبهي.”
كما أوضح سبب نجاح أغانيه قائلاً: “النجاح دلوقتي مبقاش بالصوت، بقى بحب الناس، لو الناس حبيتك هتسمع أغانيك. سبب نجاح المهرجانات أننا بنغني من الشارع للشارع، وبنجيب الكلام من تحت.”
كما كشف حمو بيكا عن حياته قبل الغناء: “اشتغلت كل حاجة من وأنا عندي 15 سنة، جزار ونجار ومبيض محارة.”
أما عن ظهوره بقطع ذهبية دائمًا، فأكد: “ده ذهب حقيقي مش فالسو، ومراتي عندها دهب أكتر مني، وعندي خزنة بشيل فيها دهبي غير الخزنة بتاعت مراتي.”
كما تطرق لموضوع وزنه، قائلاً: “حاولت أخس وخدت حقن بس بقيت أكل أكتر، ومبقتش بقدر أعيش من غير كرشي، ده هو علامتي التجارية.”
مسلسل جديد لبتول الحداد
وفي سياق منفصل، كشفت بتول الحداد عن تعاقدها على المشاركة في مسلسل اسأل روحك بطولة ياسمين صبري وأحمد فهمي، المقرر عرضه في رمضان 2026. وأوضحت: “أنا بجسد شخصية بنت اسمها سعاد، من منطقة شعبية شوية، وعيلتها على قد حالها، وعلاقتها بياسمين رئيس كلها مفاجآت.”ش
