صحح مفاهيمك.. حملة وزارة الأوقاف ضد الرشوة تخاطب الضمائر

في منشور على صفحتها الرسمية على موقع التواصل الاجتماعي فيسبوك اطلقت وزارة الأوقاف مبادرة ضد الرشوة تحت عنوان صحح مفاهيمك. 
 

واستهلت وزارة الأقاف المنشور بـ "اللي بيروّح بيته بفلوس رشوة... بيروّح بفلوس حرام!"
مش كل جنيه دخل جيبك اسمه رزق... لو جالك بطريق حرام، يبقى اسمه وزر مش رزق.

اللي بياخد رشوة علشان يسهّل مصلحة أو يعدّي ورق، بيبيع ضميره وبيظلم غيره... وبيفتح باب الفساد بإيده، حتى لو لبس بدلة شيك وقعد ورا مكتب كبير.

الرشوة شكلها مغري: فلوس سهلة، وكلام حلو، وشكر من اللي طلب الخدمة... لكن جواها سمّ، بياكل البركة، ويقلب حياتك نكد حتى لو الفلوس كتير. اللي بيرتشوا بيعكّروا المية الطاهرة، وبيبوّظوا العدل اللي بيقوم عليه أي مجتمع محترم.

ومجتمع تنتشر فيه الرشوة... عمره ما يعرف لا استقرار ولا أمان، ربنا سبحانه وتعالى قال:
﴿وَلَا تَأْكُلُوا أَمْوَالَكُم بَيْنَكُم بِالْبَاطِلِ﴾ [البقرة: 188].

وسيدنا النبي ﷺ قال: “لعن الله الراشي والمرتشي”.. وفي رواية: "والرائش بينهما" يعني اللي بيوصل ويزوّق الحرام.

ياللي بتاخد رشوة… اتقِ الله، الفلوس دي هتدخل جسمك وجسم أولادك، وهتُسأل عنها يوم لا ينفع مال ولا جاه. ما تبقاش سبب في ضياع حق، أو تعطيل مصالح الخلق.

ابدأ النهارده... ونضّف قلبك وإيدك، وارجع لضميرك، واشتغل بالحلال حتى لو قليل،
وهتشوف البركة وهي راجعة تاني لبيتك.

واختتم الوزارة المنشور بدعاء "اللهم اكفنا بحلالك عن حرامك، وأغننا بفضلك عمن سواك".