نورين أبو سعدة: نجاح أغنية «طب إيه» سببه إني بقدم حاجة حقيقية| حوار

كشفت نورين أبو سعدة عن تفاصيل نجاح أغنيتها الجديدة «طب إيه»، مؤكدة أنها سعيدة بردود فعل الجمهور، خاصة بعد تذكّر الناس لأغنيتها القديمة «بصباصة» اللي كانت تريند وقت طرحها.

وقالت نورين، في حوارها مع موقع «الجمهور»:«الحمد لله الأغنية لسه نازلة من يومين، فمستنية أشوف ردود الفعل أكتر، بس مبسوطة جدًا إن الناس افتكرت أغنية الطاسة ولسه لحد دلوقتي بيتكلموا عنها». 

وعن سر النجاح اللي بتحققه أعمالها، أوضحت:«أنا شايفة إن السبب إني بعمل الحاجة وأنا مخلصة جدًا فيها، وبقدمها بإحساس حقيقي، وطول ما أنا مؤمنة وصادقة في اللي بعمله ده بيوصل للناس».

أعمال جديدة وتجربة رمضان

وكشفت نورين عن استعدادها لتقديم أعمال غنائية جديدة خلال الفترة المقبلة، كما تحدثت عن مشاركتها في موسم رمضان الماضي من خلال تجربة تمثيلية جديدة بمسلسل "بيبو" مع الفنان كزبرة والفنانة هالة صدقي.

وقالت:«أنا وكزبرة أصدقاء جدًا من زمان، وبحب الشغل معاه جدًا، وكمان بحب لما الطاقة في اللوكيشن تبقى حلوة وكل الناس مرتاحة مع بعض، فده بيخلّي الشغل أحسن».

وعن رأيها في نوعية المسلسلات، وهل تفضّل الأعمال القصيرة أم الـ30 حلقة، قالت: «ده بيرجع للسيناريو نفسه، لو القصة محتاجة 30 حلقة يبقى ده الصح، ولو محتاجة عدد حلقات أقل يبقى الأفضل تتقدم بالشكل ده».

لو رجعت 18 سنة لورا

وخلال حضورها العرض الخاص لفيلم إذما، سُئلت نورين عن الشيء الذي كانت ستغيره لو عادت بالزمن 18 سنة للخلف، لترد قائلة: «كنت هبدأ أشتغل على موهبتي والفن من بدري جدًا، وكنت هبقى مؤمنة أكتر إن ده حلم ممكن يتحقق عادي».

كما تحدثت عن النجاح الكبير الذي حققته أغنية «بصباصة»، قائلة:«الأغنية نجحت جدًا بعد نزولها، وأنا بالنسبة لي كل النجاح ده بفضل ربنا».

طقوس العيد والأغاني المفضلة

وعن طقوسها في العيد، قالت نورين إنها تحرص دائمًا على مشاهدة مسرحية العيال كبرت، مضيفة:

«دي حاجة أساسية عندي في العيد، لأننا كنا دايمًا بنتفرج عليها في البيت، ولسه كانت شغالة عندنا امبارح».

أما عن الأغاني المرتبطة بالعيد بالنسبة لها، فقالت:«أكيد أغنية “العيد فرحة أجمل فرحة” لازم تتسمع في العيد».
 

واختتمت حديثها برسالة للجمهور قالت فيها:«كل سنة وأنتم طيبين، وعيد سعيد عليكم جميعًا، وإن شاء الله تكون أيام حلوة على الكل».