لميس الحديدي: على وزارة السياحة معاقبة الفنادق التي تمنع إقامة السيدات فوراً
علقت الإعلامية لميس الحديدي على عودة قرار منع النساء دون سن الأربعين من الإقامة في بعض الفنادق بمفردهن، وهو قرار تتخذه بعض الفنادق وليس قرارًا عامًا صادرًا عن وزارة السياحة، قائلة: "قرار قديم عاد إلى الأضواء والأنظار مجددًا، مش عارفة ليه سن الأربعين؟ لو واحدة عيانة أو طفشانة من البيت ورحت أوتيل، هيتسأل عن مبررات حياتك وليه جاية لوحدك وليه مفيش جوزك أو أخوكي".
تابعت خلال برنامجها "الصورة" المذاع على شاشة النهار قائلة: "هذا ليس في كل الفنادق، لكن في البنسيونات أو الفنادق التي تحمل تقييم ثلاث نجوم أو أربع نجوم أو أقل، ويتم منعهن بالذات تحت سن الأربعين، وكأن الست تحت هذا السن مشكوك في سلوكها، وفوقه خلاص عجزت".
قرار الفندق نفسه
وعلقت لميس الحديدي ساخرة: "طيب بالنسبة للخمسين؟ شايفينا إزاي؟ أروح أنتحر؟".
أكملت: "مافيش قرار مكتوب حقيقي، وكل شوية تتجدد هذه الحوادث، في عام 2021 حصل جدل في بعض الفنادق، وبيبقى قرار الفندق نفسه وليس نابعًا من وزارة السياحة، ورغم أن ذلك ضد الدستور، هناك مادة 62 تكفل حرية الإقامة والتنقل لكافة المواطنين، ما قالش الدستور سن الأربعين أو سنجل أو متجوزة".
معاقبة الفنادق التي تمنع النساء
واصلت لميس الحديدي: "مؤخرًا فيه زميلة صحفية نزلت في فندق في إحدى المحافظات، في بورسعيد، راحت تحجز أوضة، قالوا لها سنجل وتحت الأربعين، وتتجدد حالة الجدل، والسياحة قالت ما فيش كلام من ده".
وطالبت لميس الحديدي وزارة السياحة بمعاقبة الفنادق التي تقدم على مثل هذه الإجراءات المخالفة للدستور، قائلة: "طالما ما فيش قرار رسمي أو مكتوب وده سلوك فردي لبعض الفنادق، لازم وزارة السياحة تعاقب الفندق اللي بيعمل كده. يعني لو الفندق عمل أي مخالفة تتعلق بشروط السياحة وقوانينها بتعاقبوه، لكن ليه قصة الستات ما فيهاش عقاب أو غرامات؟".
قرار ضد الدستور
وألمحت لميس الحديدي: "طبقًا لهذا العرف اللي بتطبقه بعض الفنادق، وإحنا مش فاهمين هو عرف اجتماعي ولا عرف فندقي، طيب لو واحدة أجنبية بتسيبوها ليه؟ ممكن يكون معاها واحد؟ ويقولوا ما ينفعش نوقف السياحة وده طبعهم، لكن لو مصرية يعاملوك بعرف غير مفهوم، كأنك مشكوك فيك طالما تحت الأربعين حتى يثبت العكس، ولو فوق الأربعين روحي إنتحري".
مختتمة: "هذا ليس ضد الدستور فقط لكن ضد الأخلاق وضد الحقوق واي حاجة ولا يمكن القبول به لاي حد وعلى فكرة مش مطلوب مني تقديم مبررات زهقانة رياحة أقعد في فندق أنا حرة أعمل اللي عاوزاه طالما لم أتعدى على القانون والدستور ملكش عندي حاجة مش لازم اقدملك مبرر".
