على جثتي.. أشرف زكي يهاجم ظاهرة تواجد البلوجر والتيك توكر في السينما (فيديو)
عاد الفنان أشرف زكي، نقيب المهن التمثيلية، لإثارة الجدل من جديد، حول قراره بمنع البلوجر والتيك توكر من ممارسة مهنة التمثيل دون دراسة أو تأهيل أكاديمي.
أشرف زكي يعلق على قرار مشاركة البلوجر في الأعمال الفنية
وقال أشرف زكي، خلال تصريحات تلفزيونية، عن إمكانية مشاركتهم في الأعمال الفنية، :«أنا مش عامل القرار عشان اعمل عليه استفتاء، رحبوا أو لأ.. مش فارق معايا، إحنا درسنا وتعبنا وأدينا عمرنا للمهنة، مش هنسيبها لناس طالعين من التيك توك، أنا بدافع عن المهنة علشان في الأخر نسيبها لبتوع التيك توك لأ حد يجي يقعد مكاني.. مش هخليها مهنة من لا مهنة له، مصر هوليوود الشرق، ومش هنفرّط فيها».
وتابع: «عايز تجيب بلوجر أو تيك توكر في عمل؟، إحنا مصر أم كلثوم وعبدالحليم، مصر فاتن حمامة وعادل إمام وأحمد زكي.. مش أي حد يصور فيديوهات يبقى ممثل واللي هيجيبه ادفع غرامة مليون جنيه، لو دول اللي هيعملوا الدعاية أو بيعرفوا يمثلوا يبقى نلغي النقابة والمعاهد الفنية».
وأضاف: «أنا باخد قرار من النقابة مش عشان الإستفتاء وأنا السوشيال ميديا لا تحركني، وأن السبب الذي يحركني هو ضميري وأمانة الزملاء، وأنا بدافع عن مهنتي».
أشرف زكي ينفعل بسبب البلوجرز
وليست هذه المرة الأولى التي تتحدث فيها الفنان أشرف زكي، عن قرار منع النقابة البلوجرز والتيك توكرز من ممارسة مهنة التمثيل، وفي تصريح سابق، قال إنه ضد فكرة دخول هؤلاء الأشخاص إلى مجال التمثيل، موضحًا أنه يرفض وبشدة اتجاه المنتجين والمخرجين في الفترة الأخيرة اللي البلوجرز والتيك توكرز، مشيرًا أن التمثيل يأتي من خلال الموهبة وهناك علامات تدل على ذلك، لو في أي موهبة حقيقية بنرحب بيها، لكن لو بلوجر أو غيره والناس تقوله يالا نمثل لأ مش كده».
وانفعل أشرف زكي على الهواء، قائلًا: «التمثيل مش مهنة من لا مهنة له، شوفلكم شغلانة تانية وأبعدوا عننا.. إحنا اللي فينا مكفينا والعيب مش عليهم»، وأوضح أن الخطأ الكبير في مشاركة البلوجر يأتي من بعض الشركات المنتجة والمنتجين الذين يلهثون ورائهم بغرض شهرتهم والترويج للعمل من خلال صفحاتهم.
وأردف: «أي حد هيشتغل من غير تصريح من النقابة بدون موافقة، تصل الغرامة لمليون جنيه، أي حد عاوز يمثل من التيك توكر لازم يتقدم بتصريح من النقابة لو بتتوافر فيه الشروط بنديه موافقة، لكن الموضة بتاعت البلوجر أنا رافضها شكلاً وموضوعاً ومش هسمح بيها، ممكن يستنوا لما أمشي ومدتي تخلص ويعلموا اللي هما عاوزينه».
