أحمد النوبي يكتب: القطر بيعدي والناس بتموت.. والفتحات لسه مفتوحة!
القطر بيعدي والناس بتموت.. والفتحات لسه مفتوحة وكأن أرواح الناس رخيصة أوي في بلدنا.
كل شوية نسمع عن حد اتدهس تحت عجلات القطر مش لأنه متهور.. لأ.. لأنه معندوش بديل.
مفيش مزلقان و مفيش كوبري ومفيش نفق في بس فتحة في سور السكة.. الناس اتعلمت تعدي منها غصب عنها.
في المحلة الكبرى – بلد المصانع والصنايعية – المشهد بقى متكرر ومحفور في القلب.
أم نازلة تجيب عيش وطالبة رايحة درس وراجل رايح شغله، بيلاقوا نفسهم قدام شريط القطر يعدوا؟ ولا يستنوا الموت؟.
هو السؤال مش عنهم.. السؤال للي فوق: ليه الفتحات دي لسه مفتوحة؟.
فين التحرك؟ فين الأمان؟ فين المسؤولين وهي شايفة الناس بتموت كل يوم تحت القطر؟.
اللي بيحصل مش صدفة ولا سوء حظ، ده إهمال متعمد، والسكوت عنه جريمة.
مفيش حد فكر يعمل كوبري مشاة؟، محدش فكر يسوّر السكة بسور حقيقي مش متكسر؟.
ليه بنستنى الموت ييجي، وبعدين نقول "نحقق" و"نشوف الكاميرات"؟.
هي الكاميرا هترجع “دعاء” ولا هتمنع بكره حد مكتوب له يموت ميموتش؟.
أنا مش بطلب معجزة.. أنا بطلب بس إن المواطن يحس إنه عايش في بلد بتحميه مش بتسيبه يقطع السكة الحديد برجله ويرجع في كيس أسود!
أوعوا تقولوا "الناس غلطانة" الغلط الأكبر إن مفيش بديل.
اعملوا البديل، امنعوا الفتحات، وسيبوا القطر يعدي من غير دم.
