بطعم زمان وبمذاق لذيذ.. طريقة تحضير الفطير المشلتت في البيت
الفطير المشلتت من العلامات المميزة للمطبخ المصري، وخصوصًا في الريف، حيث أتقنته الجدات بطريقة تقليدية توارثتها الأجيال، ورغم إن بعض سيدات البيوت يجدوا صعوبة في تحضيره، إلا إن الحقيقة في سر نجاحه بسيط، وبيعتمد بشكل أساسي على العجن الجيد والصبر.
ليه تعملي الفطير المشلتت في البيت؟
بعيدًا عن الطعم الرائع، تحضير الفطير المشلتت في البيت بيوفر كتير مقارنة بالجاهز اللي أسعاره بقت مبالغ فيها وكمان تقدري تتحكمي في المكونات، وتحضريه لأفراد أسرتك بطريقتك الخاصة.
طريقة الأصلية لعمل الفطير المشلتت
التحضير: 25 دقيقة
مدة الخبز: 25 دقيقة
الكمية: تكفي 8 أشخاص
المكونات
4 أكواب دقيق فاخر
2 ملعقة كبيرة سكر
نصف ملعقة صغيرة ملح
ماء دافئ للعجن
2 ملعقة كبيرة زيت
ملعقة كبيرة عصير ليمون
300 جرام زبدة نباتية (مارجرين)
نصف كوب سميد
عسل، قشطة، زيتون، مخلل للتقديم
الطريقة
- في العجانة، ضيفي الدقيق مع السكر والملح والزيت وعصير الليمون.
- صبي الماء الدافئ تدريجيًا، واعجني لحد ما تحصلي على عجينة ناعمة ومطاطية.
- اقسمي العجين لـ8 كرات، ادهنيهم بالزيت وغطيهم، وسيبيهم يرتاحوا ساعة على الأقل (ويُفضل من 5 لـ6 ساعات).
- افردي كل كرة على سطح مدهون بالزبدة، خليها رقيقة وكبيرة، ورشي عليها زبدة وسيميد.
- طبقيها على شكل ظرف واتركيها جانبًا.
- افردي كرة تانية بنفس الطريقة، وحطي فيها الظرف الأول، وطبقيها تاني… وكرري الخطوة دي مع باقي الكرات.
- حطي الفطيرة في صينية مدهونة بالزبدة، وادهني وشها كويس، وسيبيها ترتاح نص ساعة.
- دخليها فرن متوسط الحرارة لمدة 25 دقيقة لحد ما تاخد لون دهبي جميل.
قدميها سخنة مع العسل أو القشطة أو المخللات حسب ذوقك، واستمتعي بطعم الفطير الفلاحي الأصلي.