مصطفى عنبة: معنديش صراعات في الوسط الفني وحسن شاكوش بيكرهني

أكد الفنان مصطفى عنبة، عدم وجود صراعات له في الوسط الفني لأنه يقدم موسيقى مختلفة وينافس نفسه، قائلا: "معنديش صراعات في الوسط الفني وأنا بعمل مزيكا مختلفة وبنافس نفسي وبغير من نفسي وعايز أبقى أحسن من نفسي".

وأشار مصطفى عنبه، خلال حواره ببرنامج "أسرار"، مع الإعلامية أميرة بدر، المذاع على قناة النهار، إلى أنه لم يقدم حفلات ولا أغاني منذ فترة طويلة ولم يخرج أحد يقدم ما يقدمه، مضيفا: "محدش بيلعب في حتتي وأنا نمبر وان في المنطقة بتاعتي ومنطقتي بين الراب والمهرجانات اسمها تراب شعبي وأكتر اغنية عملتها وصلت لـ100 مليون مع أحمد سعد وعصام صاصا".

وأكد مصطفى عنبه، أن حسن شاكوك يكن له الكراهية قائلا: "في ناس بتكرهني زي حسن شاكوش وعمري ما حسيت أنى مضايق منه في عز نجاحه ومش بسلم عليه عشان كل ما أقابل حد يقولي شاكوش بيتكلم عليك وحش وهو مضايق من أغنية مش شايف فيكم حد وفاكر إني أقصده، وأيضا مسلم الناس بتقولي بيكرهك".

حودة بندق صوت نادر وكزبرة أهان نفسه وحلمه التمثيل مش الغناء

أكد مطرب المهرجانات مصطفى عنبة، أن حودة بندق بمثابة أخ له ومن الأصوات النادرة في المهرجانات ومميز وفنان، موضحا أن مطربي المهرجانات ليس في عداء متواصل كما يروج البعض وأن ما يحدث من خناقات هي مفتعلة من أجل الترند.

وأضاف عنبة أن موضوع خناقات نجوم المهرجانات من أجل الترند وأصبحت واضحة للجمهور، قائلا: "الخناقات اللي بتحصل بتبقى مفتعلة والناس بقت فاهمه وبقى موضوع ممل"، وأشار إلى أنه عمل في مرة فيديو خناقة كوميدي بينه وبين كزبرة ولقت صدى كبير.

وتابع عنبة: "كزبرة اخويا وبنتكلم كل يوم وهو تعب أوي في بدايته اتهان وأهان نفسه وقل من نفسه في حاجات كتير وكان نفسه يوصل وحلمه مش الغناء لكن التمثيل والفرص مكنتش مفتوحة وأنا من اوائل المطربين الشعبيين اللي دخلوا مجال التمثيل وأنا عارف ان كزبرة هينجح في التمثيل".