أمينة شلباية: مخرج فيلم «ليه تعيشها لوحدك» لعب في دماغي

كشفت خبيرة التجميل والإتيكيت أمينة شلباية، كواليس مشاركتها في فيلم «ليه تعيشها لوحدك»، أولى تجاربها في مجال التمثيل، المقرر طرحه 3 يناير المقبل داخل دور العرض السينمائي.

وأكدت «شلباية» في تصريح خاص لـ «الجمهور»، أنها تلقت  العديد من العروض التمثيلية، ولكنها كانت ترفض خوض هذه التجربة، لأنها لم تكن شغوفة بها.

وأضافت شلباية: «التمثيل مكنش في دماغي خالص.. واتعرض عليا كذا حاجة قبل كده ومكنتش بروح.. المرة دى لما كلموني اتخضيت في الأول وقولتلهم انتم قصدكم أمينة شلباية ولا متلخبطين  قالولي لأ أنتي.. وقولت لنفسي طيب ما أجرب».

وقالت: « بصراحة لما قعدت مع المخرج حسام الجوهري اتحمست جدًا.. معرفش بقى شكله لعب في دماغي».

وأوضحت أن السر وراء موافقتها على فيلم «ليه تعيشها لوحدك»، هو أن شخصية فريدة التي تقدمها خلال أحداث العمل تشبه شخصيتها الحقيقية.

وتابعت: «واللي حمسني أكتر بردو إن الدور قريب مني جدا.. وفيها مني صفات كتيرة جدًا.. وكمان لقيت طاقم العمل منظم وده خلاني مقلقش خالص، لأني بحب النظام والمواعيد المحددة، وبعدين الجوهري قالي متخافيش أنا همرنك وفعلًا حصل».

شخصية أمينة شلباية في «ليه تعيشها لوحدك»

وقالت خبيرة التجميل أمينة شلباية  : «هو دور صغير بس اعتقد إنه هيكون كويس لأنه قريب مني.. وهي شبهي في إنها شخصيتها قوية ومطلقة وعندها بنت وبتحب الفن جدًا وشكلها قريب مني» ، مشيرة الى أنها  شعرت بالخوف في البداية، ولكنها نجحت في تخطي ذلك، قائلة: «أنا كنت خايفة جدًا وقولتله لو حسيت إني مبعرفش فى التمثيل في البروفات قولي وأنا هعتذر ومش هكمل.. واللي ساعدني أكتر إن الكاميرا بالنسبالي مش مصدر خوف وبعرف أفصل كويس أوي وأعيش على طبيعتي.. ولسه هعرف النتيجة من الجمهور».