حسين فهمى: مصر اتعاملت مع إسرائيل قبل كدة وهتعرف تتعامل تاني

تحدث الفنان حسين فهمي خلال جلسة نقاشية بعنوان «مشوار فنان»،  ضمن فعاليات مهرجان الشارقة السينمائي الدولي للأطفال والشباب، وقال : أنا سعيد جدا بوجودي هنا، بالرغم من الظروف الصعبة اللي بتمر بيها مصر خاصة، بسبب وجودنا علي الحدود مع الكيان الصهيوني، بس مصر اتعاملت مع إسرائيل قبل كده، وهتقدر تتعامل من تاني، ومع إلغاء الدورة القادمة من مهرجان القاهرة السينمائي الدولي، إلا أن في حاجتين كان لازم يخلوني متواجد هنا، الأولى هى توقيع البرتوكول مع مهرجان الشارقة السينمائي الدولي ، والثاني بسبب تكريمي».

وأردف «فهمي» قائلا: «أنا حبي للسينما بدأ بدري، من أول أفلام الأبيض والأسود القديمة، التي استهوتني جدا، وحبيتها، وخلتني اشوف السينما الأمريكية، خصوصا أن السينما الأمريكية دخل فيها الألوان بدري عننا، والخيال اللي في السينما خلاني أدور ورا القصص، واكتشفت أن السبب في مل هذا الخيال هو المخرج، ومن هنا قررت أني أكون مخرج، وبدأت أجيب كتب وأقرا وأفهم، وشكلت شخصيتي ومستقبلي من هنا».

واستكمل حديثه قائلا: «أنا جاي من أسرة أرستقراطية، وبالتالي فكرة السينما دي كانت بعيدة أوي، وقرروا أني لازم أدرس قانون إلا أني اكتشفت أن معهد السينما فتح، وأخدت أوراقي ودرست فعلا، ومن بعدها سافرت درست في جامعة كاليفورنيا في لوس انجلوس، وطبعا بدأت شغل في هوليوود هناك بعد بداية الحرب، لمدة ثلاث سنوات، إلي أن كلمني أستاذي يوسف شاهين، واللي كان وقتها بيعمل فيلم الاختيار، وكان محتاجني وقتها كـ مساعد معاه، بس هما طلبوني كـ ممثل في فيلم آخر، ونجح جدا من أول عرض، ومن هنا بدأت طريق التمثيل، وكانت الآمال دايما عندي إني أبقي مخرج، ولكن كل شوية كانت الفكرة بتبعد وبتبعد».