فتوح أحمد: «أحمد زكي أول ما شافني قالي أنت ممثل معفن»
حكى الفنان فتوح أحمد عن موقف جمعه بالفنان الراحل نور الشريف حول مفهوم السعادة وعلاقتها بالمال، موضحًا أن السعادة ليس لها علاقة بالمال كاشفاً عن أول موقف جمعه بالفنان الراحل أحمد زكي.
موقف مع نور الشريف
وقال فتوح أحمد خلال لقائه مع الإعلامية نهال طايل في برنامج تفاصيل المذاع على قناة صدى البلد2: 'كان حوار بيني وبين نور الشريف، قلت له السعادة والانبساط ملوش علاقة بالفلوس، ده موضوع تاني خالص، ولما كنت بعمل في الفيلا وببني فيها كنت بشتغل كتير جداً، عمري ما عديت فلوس لأن بيجي الظرف يروح للمقاول، يروح للمهندس، فقعدت حوالي 3 سنين ببني وأنا برجع من الشغل في الشقة اللي كانت في العمرانية، أنام وأقوم الصبح.
وأضاف فتوح أحمد: أوضة النوم اللي أنا اتجوزت بيها هي اللي راحت الفيلا، هي نفس مساحة السرير اللي بنام عليه، مفرقتش أنا في الشقة كنت بنام نوم عميق لغاية الصبح، في الفيلا بقا، ألاقي واحدة بتغمزني في كتفي، وأقوم مفزوع، تقول الكلب بيهوهو في الجنينة، قوم بص، وفي صوت عند حمام السباحة، إيه ده؟، وأقوم بالليل في عز السقعة الدنيا برد، وبعدين قالي الفنان نور الشريف بس إنت بقيت في فيلا لما بقوله قعدت 3 سنين، قلت له أصل أنا قلت له إن الشغلانة دي الحاجة الوحيدة اللي بناخدها منها البريك.
مقابلة أحمد زكي
وأوضح فتوح أحمد، أنه عندما قابل الفنان الراحل أحمد زكي قال له نصًا: "أنت فنان معفن زي أنا بس مكانش يقصد حاجة وحشة ولكن معنى الكلمة دي اني مش بعمل حساب لكل خطوة وبمثل وبسيب نفسي الي بيحصل".
وتابع فتوح أحمد: قلت له كلنا أجرنا موحد، هو البريك اللي بناخده من التمثيل، قالي إزاي؟ قلت له ما هو يا أستاذ نور في ناس بياخدوا ملايين بتروح البنك، وما بيشوفهاش بعد كدا، الفلوس دي محدش عارف بتاعة مين بعد كدا، مين اللي هياخد الفلوس دي؟ إنما هي اللقمة اللي بناكلها، قلت له حضرتك بتاخد بناتك وتروحوا مي وأختها تتفسحوا مثلاً في أوروبا في شرق آسيا، قالي آه، قلت له بتصرف كام في الرحلة دي؟ على الأقل 30 ألف دولار، قالي آه والله، قلت له هقولك على ناس عندنا في عزبة أبو قرن بياخد الراجل بياخد مراته والعيال على عربية كارو ويروح جنينة الحيوانات أو القناطر، بيرجعوا كم من السعادة مقدرش أقولك السعادة اللي هما فيها قد إيه هو وأولاده، وصارف كام في الرحلة دي 30 جنيه، فإنت هل تقدر تقولي إن السعادة بتاعتك أكبر من السعادة بتاعتهم، قالي لأ، قلت له هي المسألة فرق في الأوبشن.
