فيدرا ترد على باسم يوسف: النصر مش بس عسكري وأنت ليك دور فيه

خرجت الفنانة فيدرا عن صمتها لتعليق على منشور الإعلامي باسم يوسف الأخير، الذي أعرب فيه عن ضعف الأمل في انتصارات إيران على إسرائيل، وذلك عبر حسابها الرسمي على موقع التواصل الاجتماعي فيسبوك.

في منشورها، قالت فيدرا: “ردًا على باسم يوسف، اللي أنا بحبه وبشارك معه آراء كتير جدًا، حتى البوست الأخير اللي كلنا برضه حاسين بيه، وخايفين منه، وأنا منهم، بس برجع خطوات لورا وبشوف صورة أشمل نسبيًا، النصر مش دايمًا بيبقى عسكري، النصر له أشكال كتير وله جبهات كتير، وفي حرب بقالها أكتر من ٩٠ سنة زي الصراع الفلسطيني-الإسرائيلي، كان في ضحايا لا تُعد ولا تُحصى، أطفال، ستات، رجالة، ثمن إنساني فظيع جدًا، ده واقع مؤلم وموجع جدًا.”

واستكملت فيدرا منشورها موضحة التغير في الوعي العالمي قائلة: “لكن في حاجة تانية حصلت، لسنين طويلة جدًا، العالم كان بيسمع رواية واحدة بس، رواية الإعلام الصهيوني اللي كان مسيطر على الإعلام في الغرب، في أوروبا، في أمريكا، ودايمًا الصورة كانت إن العرب 'إرهابيين متوحشين'، وإن إسرائيل 'واحة الديمقراطية' في الشرق الأوسط، وإن دي 'أرضهم الموعودة'، لكن محدش كان بيحكي إن في شعب اتطرد من أرضه، محدش كان بيحكي إزاي الأرض اتاخدت بالقوة، محدش كان بيسمع صوت الفلسطيني أصلًا، ليه؟، لأن ببساطة ماكانش في منصة.”

وأضافت: “بعدين جه عصر السوشيال ميديا: إنستجرام، تويتر، فيسبوك، تيك توك، وفجأة… الرواية اتغيرت، اللي بيحكي القصة بقى مش موظف في قناة، بقى شاهد عيان من قلب الحدث، فيديو مباشر، طفل بيتكلم، أم بتصرخ، بيت بيتهد، العالم شاف بعينه، ومن هنا حصل تحول ضخم، الرواية التانية اتسمعت واتسمعت بقوة، والوعي العالمي بدأ يتغير، وبدأنا نشوف التغيير ده بيظهر، سياسيين جداد بيتكلموا بشكل مختلف، شخصيات عامة بتغير مواقفها، مشاهير في هوليوود بقوا يتكلموا علنًا.”

وأكدت فيدرا أن هذا التغيير لن يحدث بين ليلة وضحاها، قائلة: “التغيير الاستراتيجي بياخد وقت، في نصر تاني بيحصل، نصر في الوعي، نصر في الرواية، نصر استراتيجي طويل المدى، حتى لو في قيادات دلوقتي بتحاول تعكس الاتجاه، الزمن بيتغير، الجيل بيتغير، واللي جاي مختلف، وده في حد ذاته نصر.”

وختمت فيدرا رسالتها الموجهة إلى باسم يوسف بالقول: “والحقيقة، أن باسم كان له دور كبير في تغيير الرواة والوعي الجمعي في العالم.”