عمرو محمود ياسين يدافع عن ياسمين عبد العزيز بعد إلغاء تتر “وننسى اللي كان”
دافع المؤلف والسيناريست عمرو محمود ياسين عن النجمة ياسمين عبد العزيز، بعد الهجوم الذي تتعرض له من البعض ويتهمونها بأنها تغير في سيناريو مسلسلها الجديد "وننسى اللي كان"، والمنتظر عرضه بموسم رمضان القادم.
عمرو ياسين يدافع عن ياسمين عبد العزيز
وعلق عمرو محمود ياسين عبر حسابه الشخصي على الفيسبوك قائلا: حقيقي أنا مش مصدق اللي بيحصل مع الفنانة ياسمين عبد العزيز لو تتر اتغير من حاجه لحاجه يبقى ياسمين.
وأضاف: لو ممثله أو ممثل بيقول جملة معينة هنا أو هنا يبقى ياسمين "طيب أنا رحت فين"، لو حد لابس لبس معين يبقى ياسمين!!.
وأوضح: لو شخصيه متسمية اسم بعينه يبقى ياسمين.. وأقسم بالله أن هذا غير حقيقي! لأن المسلسل له مؤلف ومخرج ومنتج وستايلست وأقسام تخصصية، أحنا مش هواه.. أحنا بنشتغل وكل واحد فينا بيحترم دور الآخر وكل واحد مسؤول عن اختصاصاته ودوره في العمل.. أكيد بنتشاور وبنفكر مع بعض كلنا للوصول لأفضل قرارات اللي فيها مصلحة المشروع، بس الموضوع كله تصفية حسابات للأسف الشديد.
واستكمل حديثه: وهي بقت مش عارفه تعمل إيه لما تطلع ترد الناس تقول لها بتردي ليه؟ ولما تسكت الناس بتصدق الاتهامات!!.
واختتم: حقيقي أنا بشفق عليها ولكن اللي بيخليني أهدى أن ياسمين قوية جدا جدا جدا وبتقابل ده كله بسخرية وضحك وبترد تقولي أنا مش شايفاهم بس أنا متعود أواجه والناس اللي بتتابعني عارفين عني ده ولازم الجمهور يعرف الحقائق لأن أنا بعتبر الهجوم على ياسمين هو جزء من الهجوم على مشروعي اللي كلنا بنبذل فيه مجهود كبير جدا جدا، وربنا يصلح حال الجميع، وخالص التقدير والاحترام للجميع.
مسلسل “وننسى اللي كان”
يدور مسلسل وننسى اللي كان في إطار اجتماعي رومانسي تشويقي، تظهر فيه ياسمين عبدالعزيز بشخصية ممثلة شهيرة، فيما يلعب كريم فهمي دور بودي جارد، وتتشابك حياتهما العاطفية مع صراعات مثيرة، بما في ذلك محاولات طليقها تشويه سمعتها.
المسلسل مكوّن من 30 حلقة، ويشارك فيه شيرين رضا، خالد سرحان، محمد لطفي، ليلى عز العرب، منة فضالي، إدوارد، إيهاب فهمي، محمود عمرو ياسين، إلهام وجدي، وإنجي كيوان، ومن تأليف عمرو محمود ياسين وإخراج محمد الخبيري.
