طارق يحيى يهاجم المطالبين برحيل حسام حسن..اللي بيتكلم بالشكل ده إنسان تافه
أشاد طارق يحيى، المدير الرياضي لفريق أهلي طرابلس الليبي، بفوز منتخب مصر على نظيره النيجيري وديًا بهدفين مقابل هدف، في إطار استعدادات الفراعنة لبطولة كأس الأمم الإفريقية.
وقال يحيى، في تصريحات لسهام صالح عبر برنامج «الكلاسيكو» على قناة «ON»: «تجربة نيجيريا جيدة للغاية، وكان لازم نلاعب فرق كبيرة ومصنفة».
وأضاف: «سمعت إن في ناس مش عاوزة تلاعب المستويات دي عشان خايفين إنهم يمشوا، وده عيب ومع احترامي لهاني أبو ريدة، مينفعش أجيب جهاز لمنتخب مصر يكون على خلاف مع حسام حسن، وأنا شايف إن ده مقصود جدًا».
وواصل تصريحاته قائلًا: «إزاي المنتخبين يكونوا رايحين المغرب، ده يسافر بطائرة وده يسافر بطائرة تانية؟ هو ده اسمه كلام؟».
وأكمل: «كان لازم يكون في جلسة بين الاتنين، ولو كان في تنسيق مكنّاش ظهرنا بالشكل ده، ولازم ندعم المنتخب وكلنا نكون وراه ونبعد عن أي ترصد لحسام حسن، دي مصر يا جماعة».
وشدد طارق يحيى على ضرورة استمرار حسام حسن في منصبه، قائلًا: «لازم حسام حسن يكمل لحد كأس العالم مهما كانت النتائج في أمم أفريقيا، المغرب قعدت عشرات السنين عشان تظهر بالشكل ده، إحنا فين من التخطيطات دي؟».
واختتم تصريحاته مؤكدًا: «الناس اللي بتقول إحنا مش عاوزين حسام ومش بنحب حسام، واللي بيتعامل بالكلام ده، ده إنسان تافه».
