"دموعي هتفر مني".. تأثر خالد الصاوي أثناء حديثه عن فيلم وجع الفراق

شهدت فعاليات مهرجان القاهرة السينمائي لحظات شديدة التأثير خلال حفل تأبين المخرج الراحل سامح عبد العزيز، حيث أجرى الفنان خالد الصاوي لقاء خاصًا مع الإعلامية بوسي شلبي قبل عرض فيلم وجع الفراق، الذي تتولى تأليفه وإخراجه ابنة المخرج الراحل، في أولى تجاربها الإخراجية.

تأثر واضح من خالد الصاوي: "دموعي هتفر مني"

وخلال اللقاء، عبّر خالد الصاوي عن تأثره الكبير بالموقف الإنساني الذي يرافق الفيلم، قائلاً:"دموعي هتفر مني والله.. النهاردة أنا شوفت بنت سامح عبد العزيز عندها 14 سنة بتعمل أول تجربة ليها وبتطلع فيها كل حبها.. حاجة مبهرة. وزي ما بتخلي الواحد حزين بتخليه فخور. اللي خلف مماتش، وسامح ساب أعمال كلنا نفخر بيها."

وأضاف الصاوي معبرًا عن إعجابه بموهبة ابنة سامح عبد العزيز كمخرجة ناشئة:"جميلة مثلت معانا في مسلسل صدفة، فهي قريبة من الكاميرا. وسامح كان دايمًا بيفرجها على العدسات ويشرحلها. ولما الأب يبقى مخرج كبير وتقعد معاه بتشرب منه كويس. وهي بتذاكر وبتدور، وده المخرج. وكانت مالية مكانها كمخرجة. وأنا قولتلها اللي قدامك شخص عادي.. مش خالد الصاوي."

خالد الصاوي: "سامح حتة مني"

وكان خالد الصاوي قد تحدث في ندوة تأبين سامح عبد العزيز بكلمات حملت الكثير من الحزن والحنين، حيث قال:"سامح حتة مني.. والصداقة بينا في الشغل احنا معلمين بعض. قعدنا ٢٠ سنة سوا. ربنا يرحم اللي رحلوا ويقوي اللي موجودين ويفضلوا فاكرين. وسامح حاضر معانا بإيفيهاته وتوجيهاته وحتى لحظاته المشحونة."

وتابع مؤكدًا على دور ابنة سامح في استمرار أثر والدها:"سامح كان دايمًا بيجمعنا في حياته.. وفي حياته التانية. وجميلة بتجمعنا النهاردة. وبشكر الفنان حسين فهمي. الشباب هو الحياة وهو اللي بيوجهنا للحياة."

عرض فيلم وجع الفراق ضمن فعاليات المهرجان

وعُرض فيلم وجع الفراق منذ قليل ضمن فعاليات الدورة الحالية من مهرجان القاهرة السينمائي الدولي. ويُعد الفيلم تجربة شخصية وبالغة الخصوصية، إذ تستعرض فيه جميلة، ابنة سامح عبد العزيز، مشاعرها بعد وفاة والدها.

ويتضمن الفيلم 4 مشاهد سينمائية صامتة تجسّد حالة الفقد والألم بصريًا دون حوار. ويشارك في بطولته كل من: خالد الصاوي ومريم المهدي.