تريزيجيه يكشف تفاصيل ركلة جزاء كأس العالم وتصرف زيزو أمام الزمالك

كشف محمود حسن تريزيجيه، نجم النادي الأهلي، عن الكواليس الخفية وراء عودته للقلعة الحمراء، مؤكدا أن الكابتن محمود الخطيب كان صاحب الدور الأكبر في إتمام الصفقة وعودته مرة أخرى للمارد الأحمر.

وقال تريزيجيه في حواره مع الإعلامي إبراهيم فايق عبر برنامج الكورة مع فايق على قناة MBC مصر 2: "كابتن الخطيب هو أول واحد كلمني علشان أرجع الأهلي كان بيكلمني ساعات 5 الفجر علشان نخلص أمور لأن النادي التركي كان طالب مبالغ عالية".

وأضاف: "قالي النادي عاوزك وإن دا الوقت اللي لازم أرجع فيه ووعدته إني هاجي الأهلي رغم وصول عرض للنادي التركي قيمته ستة أضعاف عرض الأهلي، وراتب كبير جداً".

وأكد أن قراره لم يكن ماديا: "قررت أرجع وأنا في أفضل حالاتي مش هرجع وأنا مبطل، كنت أقدر أكمل بره لحد 34 سنة وارجع سنة وأبطل، لكن رجوعي دلوقتي في مصلحة الأهلي".

ركلة الجزاء أمام الزمالك وذاكرة الجماهير

تطرق إبراهيم فايق للحديث عن لقطة ركلة الجزاء في مباراة الزمالك بالدوري، قائلا: "من يوم ماتش الزمالك والنتيجة 1-1، عاوز أعرف عملتها إزاي؟ خدت الكورة وروحت تشوط إزاي؟"

ورد تريزيجيه قائلا:"دي كانت لحظة ضغط كبير وأنا اتعودت على الضغوط من وأنا صغير، وغلطت قبل كده لما شوطت وأنا مش رقم 1، لكن في ماتش الزمالك كنت المكلّف الأول، واللاعيبة حاولت تشيل عني الضغط".

وأضاف ضاحكا: "بن شرقي كان بيقولي ربنا يعينك يا خويا".

تريزيجيه: زيزو شخصية قوية وتوقعت ما سيواجهه ضد الزمالك

أشاد تريزيجيه بزميله أحمد زيزو ودعمه قبل مباراة الزمالك قائلاً: "زيزو لاعب كبير ومش صغير عشان يتأثر، وقبل الماتش قعدت معاه وحطيت له السيناريو اللي هيحصل، وهو كان عارف ومتوقع كل حاجة".

وتابع: "أي حد كان ممكن يتأثر من الكلام اللي اتقال عليه، لكن زيزو كان ثابت انفعالياً وده ظهر في أداؤه في الماتش".