صاحب الـ12 دبلومة من إسبانيا.. شريف البيلي في حوار لـ «الجمهور» يكشف أسرار نجاحه في إعداد نجوم التنس
الكابتن شريف البيلي صاحب مسيرة تمتد لأكثر من 25 عامًا في عالم التنس، جمع خلالها 12 دبلومة متخصصة من إسبانيا وعددًا من الشهادات من الاتحاد الدولي، جعلته من أبرز مخططي الأحمال البدنية في التنس في الشرق الأوسط.
درب أكثر من 35 لاعبا دوليا، ويقود حاليًا تدريبات كل من عمرو عصراوي، ومحمد صفوت، ولاميس الحسيني، وكنزي عبد العزيز ورغم تواضعه الدائم، إلا أن إنجازاته تتحدث عنه؛ فهو أحد العقول التي ساهمت في بناء قاعدة قوية للاعبي التنس المصريين.
وفي حوار صحفي خاص لـ «شريف البيلي» مع موقع «الجمهور» الإخباري، قال البيلي: «لدي شهادات ودبلومات من إسبانيا وشهادات من الاتحاد الدولي بتديني الأهلية إني أكون مخطط أحمال دولي، الحمد لله رب العالمين، أنا عبد الله الفقير، مش بحب أتكلم عن نفسي كثير، أنا شغال بضمير بقالى 25 سنة، وخرجت أكتر من 35 لاعب دولي».
وجاء نص الحوار كالأتي:
كيف بدأت مسيرتك في عالم التنس؟
بدأت مشواري من الصفر، كنت حابب أفهم يعني إيه تمرين، ويعني إيه حمل بدني، وإزاي أعمل تخطيط علمي بالورقة والقلم واللاب توب لمدة سنة أو خمس سنين للاعب، وتعلمت إزاي أجهز اللاعب بدنيًا وذهنيًا، وده حصل من أول ما كنت في منطقة الجيزة، ثم انتقلت إلى وادي دجلة سنة 2003.
اشتغلت مع جيل قوي جدًا، وكان معايا مدير فني مميز جدًا هو الكابتن محمد السيد، وكان بيحدث نفسه بالقراءة والدراسة وخلال خمس سنين قدرت أطور أداء عدد كبير من اللاعبين، زي علياء فخري، ومحمد صفوت، وأمين محمد قاسم، وعمرو حضورك، وإبراهيم حضورك، ونادين ظريفة.
وبعدها اشتغلت في نادي الصيد وخدت الدوري، ثم في الأهلي لمدة خمس سنين، وحققنا الدوري 3 مرات. بعد كده رحت هليوبوليس واشتغلت مع فرق ناشئة عملنا بيها قاعدة قوية جدًا.
كيف كانت تجربتك في النادي الأهلي؟
تجربة غنية جدًا، خمس سنوات مليانة شغل وإنجازات خدنا الدوري 3 مرات، وكان أكتر من نص منتخب مصر وقتها من لاعبي الأهلي، واشتغلت مع جهاز فني محترم جدًا بقيادة كابتن إبراهيم السيسي، وكابتن تامر الصاوي، وكنا دايمًا بنشتغل بنظام احترافي.. الأهلي، والصيد، ووادي دجلة كانوا مدارس كبيرة علمتني كتير.
رحلتك لإسبانيا كانت نقطة تحول.. تحدث عنها؟
أول مرة سافرت لإسبانيا كانت سنة 2011، إلى فالنسيا في أكاديمية Val Tennis Academy، واحدة من أفضل الأكاديميات في أوروبا وحصلت على أول دبلومة في Fitness Tennis من المحاضر العالمي ديفيد أندريز، مدرب اللاعب ديفيد فيرير المصنف الخامس على العالم وقتها.
قعدت هناك شهرين تدريب مكثف، 8 ساعات يوميًا، 5 أيام في الأسبوع وبعد التجربة دي، قدرت أطور أداء محمد صفوت اللي وصل من المركز 250 ITF Juniors إلى رقم 20، ثم في الرجال وصل إلى 130 عالميًا ATP.
لماذا اخترت تخصص "الفتنس" في التنس تحديدًا؟
لأني شفت إن المجال ده فيه ابتكار وتفكير وذكاء، مش مجرد تمرين، التنس محتاج توافق عضلي عصبي، وده اللي بيخلي اللاعب يتطور بسرعة.
وقتها (2011) كان عدد المدربين المتخصصين في الفتنس في مصر قليل جدًا، وكنت حابب أكون من أوائل الناس اللي تطبق الفكر الأوروبي هنا.
درست 12 دبلومة متخصصة.. ما هي الأكثر تأثيراً فكريًا؟
أكاديمية رافاييل نادال في مايوركا كانت أهم محطة، قضيت فيها حوالي شهرين مؤخرًا، درست طرق تدريب حديثة جدًا تركز على تحسين الأداء بأقل مجهود ممكن.
كمان درست في أكاديمية فالنسيا ولوبل جلوبال في إسبانيا، واتعلمت طرق جديدة لتخطيط الحمل التدريبي بشكل علمي، واللي اتعلمته هناك خلاني أقدر أعمل خطة سنوية وخماسية لأي لاعب، مبنية على قياسات حقيقية وتحليل دقيق للأداء.
من خلال تجربتك.. ما هو الفارق بين التدريب في أوروبا ومصر؟
في أوروبا التدريب كله علم ومنهج كل تمرين له هدف، وكل حمل محسوب بدقة لكن في مصر، للأسف، أغلب المدربين بيشتغلوا بالخبرة أو الاجتهاد، مش بالورقة والقلم ومفيش تخطيط حقيقي للأحمال، وده بيعمل إصابات وبيقلل من التطور.
كمان لازم يكون فيه تعاون بين مدرب التنس ومدرب اللياقة ومخطط الأحمال، وده مش موجود بالشكل الكافي، أما في أوروبا، كل مدرب له تخصصه، والكل بيشتغل في منظومة واحدة لخدمة اللاعب.
ما هي أبرز الأخطاء اللي يقع فيها اللاعب المصري بدنيًا؟
أكبر مشكلة إن اللاعب مبيسخنش كويس قبل التمرين، ولا بيعمل تهدئة بعده، بيبدأ التمرين والدم موصلش للعضلات، فبيتعرض لإصابات كمان مفيش التزام في التدريب، اللاعب ممكن يغير مدرب كل 3 أو 6 شهور، وده غلط جدًا، والمدرب لازم يقعد مع اللاعب فترة طويلة علشان يشوف التطور الحقيقي.
كيف تحدد برنامج الأحمال لأي لاعب جديد تقوده؟
بعمل تقييم شامل: قوة عضلية، حركة، سرعة، استجابة عصبية، وعمر بيولوجي وبعد كده بحط خطة تدريجية لمدة سنة على الأقل، بتتقسم لشهور، أسابيع، ووحدات تدريبية، كل شيء محسوب بالأرقام وبالتحليل العلمي من واقع الدبلومات اللي درستها في إسبانيا.
هل اللياقة البدنية تؤثر على الجانب النفسي والعقلي للاعب التنس؟
أكيد، تأثير مباشر جدًا التنس لعبة ذهنيّة بنسبة 70%، كل ما اللياقة تزيد، كل ما قدرة اللاعب على التحكم في أعصابه تزيد، وفي أوروبا بيهتموا جدًا بالجانب العقلي، وبيشتغلوا مع متخصصين نفسيين ولايف كوتشز علشان يضبطوا ذهنية اللاعب وقت الضغط.
تحدث عن تدريبك للاعبين الحاليين.. عمرو عصراوي، صفوت، لميس الحسيني، وكنزي عبد العزيز؟
محمد صفوت من أكتر الناس اللي فخور بيهم، محترف بمعنى الكلمة، اشتغلت معاه سنين طويلة من بدايته لحد وصوله للمركز 130 على العالم وعمرو عصراوي مثال للجدية والاجتهاد، كسب بطولتين ITF في شرم الشيخ، ووصل نهائي بطولة ثالثة.
أما لميس الحسيني لاعبة قوية ومميزة جدًا، عندها طموح عالي وكنزي عبد العزيز فهي من المواهب الصاعدة، عندها مستقبل واعد جدًا إن شاء الله.
في رأيك.. هل مصر أصبحت قريبة من تكوين منظومة احترافية حقيقية في التنس؟
لسه الطريق طويل.. الموهبة موجودة، لكن المشكلة في قلة الوقت والتفرغ، لأن أغلب اللاعبين مرتبطين بالدراسة كمان الجوائز المالية ضعيفة جدًا، مفيش دعم كافي من الاتحاد، وده بيخلي اللعيبة تحبط وفي أوروبا الاتحاد بيصرف على اللاعب، هنا العكس تمامًا، اللاعب هو اللي بيدفع.
إذ كنت تمتلك صلاحيات، ما هو أول قرار ستتخذه لتطوير التنس في مصر؟
هبدأ من الناشئين من سن 10 إلى 12 سنة، أعمل لهم تجمعات أسبوعية بإشراف مدربين معتمدين، ونشتغل على الأساسيات واللياقة، ونبني قاعدة قوية.. الاحتراف بيبدأ من الناشئين، مش من فوق.
ما هي نصيحتك للاعب الذي يبدأ طريقه في التنس؟
الالتزام، الجدية، وعدم الغياب.. التنس أصعب لعبة في العالم من ناحية الفتنس، ومحتاجة مثابرة واستمرارية، واللي مش ملتزم مش هيوصل، حتى لو عنده موهبة.
رسالتك الأخيرة لوزارة الشباب واتحاد التنس؟
أتمنى من الاتحاد والوزارة إنهم يهتموا بقطاع الناشئين أكتر، ويوفروا دعم مالي حقيقي كمان لازم يتم اختيار المدربين بناءً على الكفاءة والشهادات والخبرة الدولية، مش المحسوبية وعايزين منظومة تخرج أبطال بجد، تمثل مصر وتخليها دايمًا في المقدمة.
كلمة أخيرة لمن تعاملت معهم في مسيرتك؟
بشكر كل المدربين اللي اشتغلت معاهم من سنة 2000 لحد النهارده، وبالأخص: كابتن محمد السيد، نبيل عبد الله، تامر الصاوي، إبراهيم السيسي، محمد فؤاد، خالد عبد السلام، سيد كسبان، وعمرو الطويل.
وبشكر الأكاديميات اللي اشتغلت فيها: وادي دجلة، الأهلي، الصيد، هليوبوليس، والشروق، وكمان بشكر الأكاديميات الأجنبية اللي علمتني كتير زي: Val Tennis Academy، Rafael Nadal Academy، Madrona Academy، وAltour Tennis وبقول دايمًا: «كل يوم نحلم نطلع لاعب دولي جديد لمصر». وفي الختام، أعرب شريف البيلي عن امتنانه العميق للمدربين والكوادر الفنية الذين ساهموا في تطوير اللاعبين خلال بطولة المستقبل الدولية 2025، وأكد على الدور البارز الذي لعبه كل من: تامر الصاوي، إبراهيم أبو طالب، محمد السيد، محمد فؤاد، جيهاد الديب، وعمرو الطويل كما وجه شكره الخاص لأكاديمية إسماش المحترفة على جهودها الكبيرة في دعم الشباب وصقل مواهبهم.
وخص شريف بالذكر عدد من المدربين الذين تركوا بصمة واضحة في مسيرة اللاعبين، وهم: كابتن سنونسي، كابتن عماد شكري، وأخيراً كابتن سيد كسبان، الذي وصفه بأنه أفضل مدرب عام في مصر، مؤكدًا على مكانته المرموقة وإسهاماته الكبيرة في الارتقاء بمستوى اللاعبين.
كما أعرب شريف عن تقديره العميق للمدرب المتميز كابتن عبدالله عبد الأخر، واصفاً إياه بالمدرب المحترف الذي يمتلك خبرة واسعة ويستطيع تطوير اللاعبين في وقت قصير.
وأوضح أن عبد الأخر هو المسؤول عن تدريب بطلة إفريقيا، كنزي عبد العزيز، التي تمتاز بالروح القتالية العالية، معربًا عن فخره بالعمل إلى جانبه.
عمرو عصراوي..موهبة استثنائية في عالم التنس
ولم يفت شريف الفرصة للتأكيد على شخصية اللاعب الدولي عمرو عصراوي، وأشاد به باعتباره أفضل شخصية وبطل دولي، ووصفه بأنه اللاعب الأفضل على الإطلاق، يتميز بالموهبة الاستثنائية والطموح والشجاعة، وأنه مقاتل حقيقي على أرض الملعب.
وأضاف أن عصراوي يمثل فخر لإسكندرية ومصر كلها، مشيراً إلى احترامه وتقديره الكبير لهذا اللاعب الواعد.
وذكر في حديثه ان عمرو عصراوي حصل على ثلاث بطولات متتاليه بطوله بطوله المستقبل الدوليه بشرم الشيخ 25,000 دولار هذه اول اسبوع الاسبوع الثاني البطوله الدوليه بطولة المستقبل الدولية في شرم الشيخ 15000 دولار.
