لمست حبهم لمصر.. محمد رمضان يرد على انتقادات تعاونه مع لارا ترامب
تحدث النجم محمد رمضان عن موجة الانتقادات التي تعرض لها مؤخرًا بعد إعلان تعاونه مع لارا ترامب، زوجة نجل الرئيس الأمريكي السابق دونالد ترامب، مؤكدًا أنه لا يلتفت لهذه الهجمات، ويواصل التركيز على عمله ونجاحاته.
محمد رمضان يعلق على تعاونه مع لارا ترامب
وقال رمضان في تصريحات تلفزيونية:«مبردش على الانتقادات وعديت على موجات عالية، وفي الآخر ربنا اسمه العدل ومبيرضاش بالظلم، وساعات بتأثر بس برجع وأفكر إن لما بتكون شايف مسافة عالية لازم تعذر اللي عنده قصر نظر».
وأوضح الفنان أنه يحاول دائمًا إبعاد عائلته عن تأثير الانتقادات، قائلاً:«أي ضريبة بتحب تدفعها لوحدك بعيد عن عيلتك، وبحاول أشرح لهم إننا في دنيا مش جنة، وإن كل حاجة لها تمن، ومفيش طريق مفروش بالورود، فلو اخترنا مكان مميز لازم نكون قد اللي هنقابله ومستعدين نفسيًا».
وأضاف محمد رمضان:«في الآخر إحنا اللي هننتصر، لأن طمعنا مش في شخص، طمعنا في ربنا وفي النجاح، وما بنأذيش حد ولا بنسعى نأخد حاجة من جيب حد، وربنا دايمًا بيساعد اللي نيتهم خير».
وكشف محمد رمضان تفاصيل تقربه من عائلة الرئيس الأمريكي دونالد ترامب بعد تعاونه مع لارا ترامب في أحد الأعمال الفنية، مؤكدًا أن التجربة كانت إيجابية للغاية.
وقال: «في نفس الوقت اللي صورت فيه الكليب مع لارا ترامب، كان في مؤتمر شرم الشيخ للسلام، ووجود الرئيس الأمريكي في مصر، وكنت مبسوط جدًا».
وأضاف النجم:«لما قربت منهم بشكل شخصي ودخلت بيتهم، لمست قد إيه بيحبوا مصر والعرب، وقد إيه بيدعموا السلام، فكنت سعيد جدًا بانتشار روح السلام زي ما ربنا أمر».
