ياسين منصور: تخطينا سماء إفريقيا والأهلي مكانه دوري أبطال أوروبا

أشاد رجل الأعمال ياسين منصور، المرشح على منصب نائب رئيس النادي الأهلي في قائمة محمود الخطيب، بمستوى المارد الأحمر في الفترات الأخيرة، مشيرًا إلى تخطيه المنافسه في القارة الإفريقية وأنه يستحق المشاركة في دوري أبطال أوروبا بدلًا من إفريقيا.

وتطرق ياسين منصور للحديث عن أسباب عودته للنادي الأهلي وخوضه انتخابات مجلس إدارة النادي في قائمة محمود الخطيب، بجانب حديثه عن مستوى الأحمر.

أسباب عودة ياسين منصور للأهلي

قال منصور: "عودتي للنادي الأهلي في التوقيت الحالي لها أكثر من سبب، من ضمنها أسباب شخصية، في الفترات السابقة، كان من الصعب علي التواجد في مجلس إدارة الأهلي بسبب ضغط الشغل، لكن دلوقتي ابني الكبير بيساعدني في إدارة شركتي، وده خلاني أحس إن الوقت مناسب وصحيح للتفكير في العودة".

وأضاف: "محمود الخطيب أسطورة كروية حقيقية، وفتح معايا النقاش بخصوص ترشحي لرئاسة النادي الأهلي بسبب ظروفه الصحية، أو التواجد كنائب معاه في القائمة، قلتله إن الأفضل بالنسبة لي إني أكون نائب، لأني محتاج من 3 لـ6 شهور علشان أتعرف على تفاصيل الإدارة وأفهم طبيعة النادي كويس قبل اتخاذ أي قرارات".

وتابع: "اللي بحلم بيه في النادي الأهلي هو وجود مؤشر أداء لكل شخص في مكانه، علشان يتم التقييم والمحاسبة على أساسه، وهدفنا نوصل بالأهلي لأحدث ما وصلت له الإدارة الرياضية في العالم ونطبقه على أرض الواقع".

وزاد: "من وجهة نظري، الأهلي مش بس نادي بيلعب في إفريقيا، ده كيان كبير بيلعب فعليًا في أوروبا وبينافس في دوري الأبطال، وهو علامة تجارية ضخمة في الشرق الأوسط كله".

وأتم: “أبناء النادي الأهلي دايمًا عندهم طبيعة خاصة، وهي إن مصلحة الأهلي دايمًا قبل أي حاجة تانية أو أي شخص، وأنا بدأت أشجع الأهلي من وأنا عندي 4 سنين، ومن الإسكندرية، وكنا بنتعرض أنا وأصحابي للضرب من جماهير الاتحاد وقت ماتشات الأهلي علشان بنشجعه، لكن ده ما خلانيش أبطل حبه ولا يوم”.