باسم يوسف: فقدت أهلية إني أكون طبيب وبقالي 15 سنة محطتش إيدي على عيان

كشف الإعلامي باسم يوسف العديد من الأسرار حول حياته، في حلقة اليوم من برنامج "كلمة أخيرة" الذي يقدمه الإعلامي أحمد سالم، على قناة ON، وذلك في أول ظهور له على الشاشة المصرية منذ سنوات.

وأعرب باسم يوسف في بداية لقائه عن سعادته بالظهور الإعلامي من خلال قناة ON، التي شهدت أول ظهور له عام 2011.

وفي بداية الحوار، داعبه أحمد سالم قائلاً:"اتفقنا هتقولي أستاذ هقولك يا دكتور وأنا عارف علاقتك بالطب مش زي الأول"، ليرد عليه باسم يوسف قائلاً:"أنا فقدت الحق إني يتقال لي دكتور، وبقالي 15 سنة ما حطتش إيدي على عيان وده لمصلحتهم، أنا فقدت هذه الأهلية من زمان جدًا".

شائعات تطارد باسم يوسف

وتطرق الحوار إلى الشائعات التي تطارد باسم يوسف مع كل ظهور إعلامي، حيث قال:
"كل ما بطلع في أي برنامج أو لقاء تطلع شائعات إني باخد فلوس كتير، وطبعًا ده بيهدد جوازي، ومراتي الله يكون في عونها، لأنه بيطلع أخبار عن مبالغ ضخمة وعملاقة، مبالغ أخدها علشان أقدم برنامج، أو أخدها علشان يشتروا تمن سكوتي، علشان أنا عميل، اتكلم اقبض، اسكت اقبض.. وجهات خارجية بتمولني من بره، وجهات داخلية دافعة لي من جوه، وطبعًا مراتك لما تقرأ الكلام ده هتشك فيك.. انت طالع واكل ونازل واكل، هتسأل نفسها: أنت بتودي الفلوس فين؟ متجوز عليا ولا فاتح بيت تاني؟.. والفلوس دي تفتح أربع بيوت".

وأضاف باسم يوسف ساخرًا:"بقولها أنا ماخدتش 22 مليون جنيه، أنا خدت 22 مليون دولار.. وبقول لكل الجهات القائمة على الإعلام في العالم الغربي ده أجري وسعري، عندي استعداد أقدم أفلام، أعياد ميلاد، أو طهور أو إعلانات، اللي أنتم عاوزينه".

ارتباط اسمه بالجدل والشائعات

ولدى سؤاله عن سبب ارتباط اسمه بالجدل والشائعات، قال باسم يوسف:"مش عارف التوقعات قايمة على إيه.. الضجة وإثارة الجدل، شايف إني واحد ما استحقش كل ده، ساعات بحس إني في مكان مش بتاعي، مش عارف أنا محظوظ ولا موجود في مكان ما استحقوش، وحاجة جوايا تقولي: أنت مش كوميديان، أنت وليد صدفة.. أنا الراجل الغلط في المكان الغلط.. بلاقي نفسي في مكان مش بتاعي.. واحد بيحب الكوميديا وبعدين لقيت نفسي في أخبار السياسة أكتر من الكوميديا، ده شيء مبرجلني، واحد بيعمل كوميديا، بلاقي نفسي في أخبار كوميديا، زي تريزيجيه اللي تقرأ عنه أخبار في صفحة الحوادث".

واسترجع باسم يوسف بداياته، قائلاً:" معظم الشباب الصغير مش فاهمين ليه الدوشة؟ مين عمو اللي طالع على التلفزيون ده؟".

سبب ظهور باسم مجددًا

وعن سبب انتظار الجمهور لظهوره مجددًا: “الناس عاوزة تتسلى، لو عملت حوار مع لعيب كورة، ممثل مشهور، ممثل له شعبية، أو إنفلونسر، الناس مستعدة تدفع فلوس من وقتها علشان التسلية دي.. أكتر حاجة بتسمعها: إزاي لعيب كورة ياخد الفلوس دي؟ يعني إيه أتمرمط في هندسة وطب، وييجي واحد أراجوز ولا إنفلونسر ياخد في الدقيقة أكتر ما باخد في السنة؟ أنا كواحد أتمرمط في الطب 20 سنة، شايف الموضوع ده صح جدًا.

واستكمل باسم يوسف: "ممكن تكون شايفه مش عدل، ولكن له مبرر.. الناس بتجيبك كدكتور كاحتياج،  لكن اللي بيروح ماتش كورة أو ستاند أب كوميدي أو فيلم رايح بمزاجه، الناس مستعدة تدفع علشان المزاج أكتر ما تدفع علشان الاحتياج. كلنا سلع في الآخر، الناس بتروح للي بيسليها".