إصابة إنجي عبد الله بورم في جذع المخ.. و«كل الأطباء رافضين يعالجوني»

في منشور مؤثر عبر حسابها الرسمي على موقع فيسبوك، كشفت الفنانة إنجي عبد الله عن تفاصيل مؤلمة من رحلتها مع ورم حميد في جذع المخ، مؤكدة أن حالتها الصحية في تدهور مستمر، وسط رفض الأطباء في مصر وخارجها لمواصلة علاجها، نظرًا لحساسية موقع الورم وخطورة التدخلات الطبية فيه.

 "ورم حميد في أخطر مكان بالمخ"... ومعاناة إنجي عبد الله تتجدد بعد سنوات

قالت إنجي عبد الله:"عدى 6 شهور وأنا بحاول أتعالج للمرة التانية من ورم في جذع المخ، مش سرطان، لكنه في أخطر مكان في المخ للأسف كل الدكاترة في مصر وبره مصر، أساتذة في الأورام والمخ والأعصاب، رفضوا يعالجوني."

وأوضحت أن السبب يعود لتاريخها العلاجي: "أنا كنت أخدت كل جلسات الإشعاع والكيماوي المسموح بيها في 2019، وكنت فأكرة إن الموضوع انتهى، لكن للأسف رجعتلي أعراض أسوأ بكتير من الأول."

 أعراض صادمة: فقدان الإحساس وكهرباء في الجسم

وتحدثت إنجي عن أعراض المرض القاسية التي تعاني منها يوميًا:"فقدت الإحساس بالجنب اليمين، وصعوبة شديدة في البلع، وكل جسمي بيحصله كهربا حتى مع أبسط حركة.. حتى لما بحرك عيني بحس بألم."

كما كشفت عن واقعة صادمة في أحد المستشفيات : "رجعت المستشفى اللي اتعالجت فيها قبل كده، بنصيحة من الدكتور تامر النحاس، اللي هو شخصيًا رفض يعالجني، والمستشفى طلبت مني أوقع إقرار إني مسؤولة عن أي حاجة ممكن تحصللي لو اتعالجت… طبعًا مشيت من الخوف."

 "أنا بتدهور كل يوم.. وأختي حالتها أصعب مني"

في لحظة مؤلمة، تحدثت إنجي عن حالتها النفسية الصعبة، وكشفت عن معاناة شقيقتها أيضًا :"أنا مش بتمسك بالحياة، أنا بس تعبانة جدًا وبطلب من ربنا حاجة واحدة: اللهم لا نسألك رد القضاء ولكن نسألك اللطف فيه."

وأضافت : "الشخص الوحيد اللي واقف جنبي هي أختي، وهي نفسها عندها ورم في الرئة والمخ – مرحلة رابعة.. وكنت فاكرة إن أنا اللي هخلي بالي منها."

 "الحياة صعبة ومفاجآتها أصعب"

اختتمت إنجي عبد الله منشورها بكلمات تقطع القلب :"أنا حالتي بتتأخر كل شوية، وشوفت حاجات صعب حتى أوصفها، أنا راضية بقضاء ربنا، لكنه صعب جدًا، ليا ولأختي.. والحياة بجد صعبة ومفاجآتها أصعب."