معتزة عبد الصبور تتصدر التريند بسبب قانون الإيجار القديم | تفاصيل

تصدر اسم الفنانة معتزة عبد الصبور ابنة الشاعر الراحل صلاح عبدالصبور، محركات البحث جوجل خلال الساعات الماضية ، بعد أن تم إبلاغها أنها ستترك الشقة التي تعيش فيها حاليا في مدة أقصاها 7 سنوات، حيث أنها إيجار قديم، ووفقا لقانون الإيجار القديم الذي تم إقراره وتطبيقه فأنها لابد أن تترك الشقة بعد تلك المدة.

معتزة عبد الصبور تتصدر التريند بسبب قانون الإيجار القديم  

وشعرت الفنانة معتزة عبد الصبور، بحالة من الحزن والآسي بسبب تركها للشقة التي تعيش فيها منذ سنوات طويلة، تلك الحالة من الحزن جعلتها تصاب بأزمة نفسية وصحية صعبة.

اعتذار معتزة عبد الصبور

وعلقت الفنانة معتزة عبد الصبور، عبر حسابها الشخصي على الفيسبوك، قائلة: “ بعتذر لكل الصحفيين اللي حاولوا يتواصلوا معايا وأنا مردتش، أرجو تقبل محبتي واعتذاري عن أي حوارات، أنا مواطنة مصرية عادية جدا بكتب على صفحتي للونس وقت الشدة لأنى لوحدي فبحتاج ونس، وأنا أبعد ما يكون عن إني أحب أي شيء بكتبه عن حالي يكون تريند، حالى هو حال كثيرين جدا هيمشوا من بيوتهم بعد سبع سنوات أو قبل وفقا لرحمة المالك بهم وربنا ينجى الجميع يارب، خصوصا في ظرف زى ده وفي حالتي الصحية المتردية الآن”.

وأضافت الفنانة معتزة عبد الصبور: “أرجوكم مش عايزة أبقى تريند بالمرة أنا حكيت فقط من فرط الألم وقلة الحيلة، محترمة جدا ومقدرة جدا الاهتمام الصادق، بس أنا تعبانة جدا جدا، رجاء تقبل محبتي واعتذاري، واللي عايزة ربنا في أي شيء وفى كل شيء هو اللي هيكون، وأنا مسلمة أمرى تماما تماما إلى الخالق وهو أرحم الراحمين”.

قانون الإيجار القديم

وتابعت: “خلصت كل خناقاتى في الدنيا وتشبثى بأى شىء فيها، أبويا مش في حيطان شقة، روحه منثورة في العالم كله، وأنا روحي مع كل اللي عرفوني وحبوني بصدق، لو راحت الحيطان برضه إحنا باقيين في أرواح خلق الله، قيمتنا وأثرنا في الدنيا مش مزنوق في حيطان”.

واستكملت حديثها قائلة: “حاش لله إنى بكون بحط نفسى فى مرتبة قيمة وأثر أبويا وواثقة فى حسن فهم ونية القارىء، أنا مهمتى الوحيدة الآن هى مراعاة صحتى حتى أكمل مسؤولياتي العالقة تجاه مكتبة أبويا وتجاه القطتتين اللى فى رقبتى، وانى أمشى، معنديش اى شيء أطلبه من أي حد ولا أي شيء أقوله، الموقف أكثر إيلاما وقسوة بالنسبة لي من أي كلام أو أي رجاء من أي حد غير الخالق”.

وأشارت: “ساعدوني إني أمشى في سلام وهدوء، الدنيا ضاقت عليا أوى وبتقولي انتى ملكيش مكان وعارفة إني بواجه حاجة وقوة أكبر من قدراتى البسيطة جدا على مواجهتها، فاعايزة أخرج في براح ربنا في راحة وأمان ربنا محدش يشيل همى، أنا واثقة أنه ربنا أيا كانت صورة الرحمة اللي هيقدمها ليا هتبقى هى الصح، يمكن حزني الوحيد هو إنى كنت ابتديت أكون مؤثرة فى حياة كل طلبة التمثيل اللى كان ليا شرف تدريبهم وشفت الأثر وشفت تعلقهم بيا وأقسمت بينى وبين نفسى أن ده يكون مشوارى وكل تركيزى حتى آخر عمرى، وخاصة الموهوبين جدا اللى معندهمش القدرة المادية أنهم يروحوا وركشوبس بآلاف الجنيهات، وكان صوت أبويا دائما فى أذنى أن تمرير علمى هو أكتر شىء محترم بعمله وكنت أنا وطلبتى فى قمة السعادة لأن بنعمل حاجة عليها القيمة أوى ومش عايزين حاجات كتير مادية من الدنيا”.

البحث عن بديل

وألمحت الفنانة معتزة عبد الصبور: “الرحلة دى هتنقطع لأنى دلوقتى مجبرة أركز فى ترتيب وإخلاء بيت قارب عمره الستين سنة من حياة أسرة، ومش ببحث عن بديل، ببحث عن خلاص وسنوات أخيرة فى عمرى أقضيها فى سلام وتقبل”.

وأوضحت الفنانة معتزة عبد الصبور: “مش بس كدة، الحزن والوجع علشان أكون صادقة جدا، مش هستنى لأى يوم أتهان أو أتوجع فيه أكتر من كدة أو أطلب مسكن أو مأوى من أى حد أو أي شيء من هذا القبيل على الإطلاق لأن ده نوع آخر من قتل الروح النبيلة واذلالها حتى النهاية، الألم أكبر من أى تحمل لقلبي الراقي والرقيق اللى من وأنا طفلة لا ينشد شىء إلا السلام والمحبة”.

وحكت الفنانة معتزة عبد الصبور قائلة: “ده قدرى وأنا متقبلاه تماما بنفس النبل وعزة النفس اللى اتربيت عليهم فى بيت عزيز النفس جدا، وبتعلم التخلى تماما، حتى الرحيل، السبع سنوات الجايين هتشوفوا وهتسمعوا فيهم عن مأسى كتير لأسر كتير جدا تدمى القلب، مأسى وقسوة أكبر من أن يتحملها قلب من فطر على الرحمة والخير والحب والإنسانية”.

وداع وفراق

وتابعت: “أنا وكل أسرتى عيشنا حياتنا بمنتهى الشرف وخدمنا بلدنا بمنتهى الحب والتفانى، وده جوهر شرفنا وعزة نفسنا، امبارح بالليل فى الإسكندرية وأنا بودع طلابي اللى عملت معاهم وركشوب قد يكون الأجمل والأكثر شفافية واحدة منهم أنا عارفة أن عندها درجة عالية من الشفافية جدا لمحت نظرتها ليا وإحنا بنودع بعض، كانت عينيها بتقول أنا عارفة إنى مش هشوفك تانى بالرغم أننا كلنا بنمثل أنه فيه بعد وإنك جاية تانى وإنك هتنجى من ده، بس انتى أهديتينا روحك وإحنا أهديناكى روحنا علشان نطبطب على بعض وتحسى بسلام، الأيام الأخيرة تبقى سلام”.

واختتمت الفنانة معتزة عبد الصبور: استودعكم، مبقاش عالمي ولا دى دنيتى يا حبايبى ومحدش يرضالى إنى أعيش فى ذعر أو مهانة أو ألم نفسى لا يحتمل، أبقى مجرد شبح مما كنت عليه من حبى وشغفي وأملى في الحياة، محبتي واحترامي للجميع .