وليد خليل: غزل المحلة يسير بثبات.. ونثق في لاعبينا أمام الأهلي
أكد وليد خليل، رئيس نادي غزل المحلة، على أن فريقه يسير بخطى ثابتة خلال الموسم الحالي في مسابقة الدوري الممتاز، معربًا عن رضاه عن الأداء والنتائج حتى الآن.
وأضاف خليل: "مستوى الفريق بيتطور من مباراة للتانية، وإحنا راضين عن اللي اتحقق لحد دلوقتي، وراضيين عن مستوى اللاعبين في الدوري".
مواجهة غزل المحلة أمام الأهلي
وتابع: "مباراة الأهلي دايمًا ليها طابع خاص، وهو نادٍ كبير وعنده لاعيبة على أعلى مستوى، وصعب تتوقع نتيجتها، لكن عندنا ثقة في قدرات لاعبينا على تقديم أداء قوي والخروج بنتيجة إيجابية".
وأشار: "الفرق الكبيرة والمباريات الجماهيرية زي دي بتكون ليها طبيعة مختلفة، وعلشان كده بنحط مكافآت تحفيزية للاعبين علشان يقدّموا أفضل ما عندهم".
وواصل: "علاء عبدالعال مدرب محترم وكبير، واخترناه عن اقتناع تام بإمكانياته، وبنعتبره الأنسب للمرحلة دي، لأنه يملك خبرات كبيرة في التعامل مع كل الظروف".
وأوضح: "الفريق يضم مجموعة مميزة من اللاعبين القادرين على صناعة الفارق، ومجلس الإدارة لديه خطة واضحة لإعادة النادي لمكانته التاريخية، والموسم الحالي هيكون مختلف تمامًا، وهدفنا إن المحلة يرجع يظهر بالشكل اللي يليق باسمه وتاريخه".
وأبدى خليل استياءه من ظاهرة تفريغ الفرق الجماهيرية من نجومها، مؤكدًا: "اللي بيحصل ده بيأثر سلبيًا على أندية كتير، لكن إحنا في المحلة بنشتغل على الحفاظ على عناصرنا المميزة لتحقيق الاستقرار الفني".
واختتم تصريحاته قائلاً: "بنهدف لموسم قوي ومنافسة مشرفة، ونعتمد على توليفة من الخبرة والشباب علشان نحقق طموحات جماهيرنا".