تنسيق الجامعات 2025|اللي جاب 80% والفرص الخفية في تنسيق المرحلة التانية
مع بداية المرحلة الثانية في تنسيق الجامعات 2025، يتكرر السؤال من آلاف الطلاب الحاصلين على مجموع يتراوح بين 75 و85%، وخاصة من حصلوا على 80%: "هندخل إيه؟ وإيه الكليات اللي لسه فاضية؟".
رغم انقضاء المرحلة الأولى التي شهدت إقبالًا كبيرًا على كليات القمة، إلا أن الفرصة لاتزال متاحة ، وفيه كليات مميزة وبرامج عملية لطلاب الشعبتين الأدبية والعلمية، مش شرط تكون مشهورة زي طب أو إعلام، لكنها ممكن تفتح لك أبواب شغل وفرص كويسة في المستقبل، وفق تنسيق الجامعات.
لطلاب علمي علوم.. التمريض والزراعة والعلوم لسه متاحة
بالنسبة لطلاب الشعبة العلمية (علوم) الحاصلين على حوالي 80%، ففرص القبول مازالت متوفرة في:
كليات التمريض في جامعات زي بني سويف والمنيا وسوهاج وأسيوط، وهي كليات بتؤهل مباشرة لسوق العمل وبتوفر فرص تعيين حكومي.
كليات الزراعة في أغلب الجامعات الإقليمية، واللي بقت مطلوبة في ظل التوجه نحو الزراعة الحديثة والأمن الغذائي.
كليات العلوم في جامعات زي جنوب الوادي والسويس وأسوان، وممكن تكون بوابة للبحث العلمي أو الشغل في شركات التحاليل والدواء.
برامج العلوم الصحية التطبيقية والمعاهد الفنية الصحية، ودي كمان بتدي فرص عمل قوية بعد التخرج.
لطلاب علمي رياضة.. هندسة وطاقة وحاسبات لسه في أمل
لو انت من طلاب علمي رياضة وجبت حوالي 80%، ففيه بعض الكليات لسه بتستقبل طلاب تنسيق الجامعات للمرحلة الثانية، زي:
هندسة الطاقة بأسوان وبرامج هندسة نوعية في جامعات الأقاليم.
كليات الحاسبات والمعلومات بنظام الساعات المعتمدة، وكمان برامج الذكاء الاصطناعي.
كليات التكنولوجيا والتعليم الصناعي، اللي بقت مطلوبة جدًا في سوق العمل الفني والتقني.
طلاب الأدبي.. الفرصة في التجارة والتربية والآداب
رغم إن كليات زي إعلام وألسن كانت من نصيب المرحلة الأولى، إلا إن طلاب الأدبي عندهم فرص حقيقية في:
كليات التجارة (انتظام أو انتساب) في عدد كبير من الجامعات، وفق تنسيق الجامعات.
كليات التربية والآداب متوفرة في جامعات زي بني سويف، الفيوم، جنوب الوادي، وأسوان.
كليات الخدمة الاجتماعية والسياحة والفنادق، ودي كليات بتفتح مجالات في الشغل الاجتماعي والإداري والسياحي.
كليات التربية النوعية والتربية الرياضية، حسب الرغبة والموهبة.
نصائح مهمة: فكر عملي وابعد عن التقليدي تنسيق الجامعات
لو جبت حوالي 80%، مش لازم تمشي وراء اسم الكلية المشهور، فكر في:
الفرص اللي بتأهلك لسوق العمل سريعًا.
البرامج اللي فيها تدريب عملي وتعاون مع شركات.
البعد الجغرافي من بيتك، ولو في محافظة تانية، شوف السكن الجامعي.
التخصصات الجديدة زي تحليل البيانات، اللوجستيات، والذكاء الاصطناعي.
80% مش نهاية الحلم.. وممكن تكون بداية طريق عملي
ووفق تنسيق الجامعات،ـ فأن 80% مش نهاية الحلم.. وممكن تكون بداية طريق عملي ناجح جدًا، لو اخترت صح. التنسيق مرحلة، لكن القرار في إيدك. دور كويس، اسأل، وخد قرار على أساس المعلومة مش الشائعة.
