يوسف بشر لـ «الجمهور»: سيد عبد الحفيظ ChatGPT الكرة المصرية
أشاد المدرب المصري الشاب يوسف بشر، الذي خاض تجربة تدريبية سابقة في النادي الأهلي مع المدير الفني السويسري مارسيل كولر، بسيد عبد الحفيظ، مدير الكرة السابق، مؤكدًا أنه واحد من أهم وأصدق الشخصيات التي قابلها في الوسط الرياضي، ووصفه بأنه «قلب الأهلي النابض و خط دفاعه الاول وصمام أمانه».
يوسف بشر لـ «الجمهور»: سيد عبد الحفيظ ChatGPT الكرة المصرية
وقال يوسف بشر في تصريحات خاصة لـ «الجمهور»: اللقاء الأول مع كابتن سيد عبد الحفيظ كان بعد جلسة جمعتني بالمدير الفني مارسيل كولر، وقتها عرفت إن عندي مقابلة معاه تاني يوم، وفرحت جدًا، لأني كنت متابعه من زمان وبحترمه بشكل كبير جدًا، كان عندي إحساس حقيقي إني هقابل حد مختلف، وبالفعل كابتن سيد بالنسبة لي من أهم وأصدق الناس في الكرة المصرية.
وأضاف بشر: «يومها رجعت البيت وفتحت اليوتيوب، وبدأت أتابع لقاءات قديمة ليه، كنت عايز أدخل الجلسة وأنا فاهم طريقته في التفكير وأسلوبه في التواصل، مش بس كمتابع عادي، لكن كشخص هيقعد معاه وجهًا لوجه لأول مرة. في الأول كنت متخيل إني هقابل شخص شديد وصارم فقط، لكن لما ركزت معاه أكتر حسيت بجانب إنساني عميق ودمه خفيف جدا».
وعن تفاصيل اللقاء الأول، قال يوسف بشر: «أول ما قابلته فعلًا، انبهرت بطريقة كلامه وتعامله؛ إنسان محترم، كاريزما عالية، وبيتكلم بثقة وهدوء، كان واضح جدًا إنه مثقف جدا و شخصيه عميقه، وبيعرف يوجّه بدون ما يفرض رأيه أو يضغط عليك».
وفي واحدة من العبارات اللافتة، شبّه بشر عبد الحفيظ بقوله: «أنا قلتها قبل كده وبكررها مرة تانية: لو في ChatGPT للكورة المصرية، فهو بالتأكيد سيد عبد الحفيظ! موسوعة كروية، بيتكلم في كل شيء بدقة رهيبة، وبيعرف يوصل أفكاره بأسلوب بسيط ومقنع جدًا لأي حد».
وكشف بشر عن موقف إنساني جمعه بعبد الحفيظ، قال عنه: «في نفس الجلسة قالي حاجة لطيفة جدًا، أثرت فيّ بشكل كبير، قالّي حرفيًا: (أنا باعتبرك زي ابني، واسمك يوسف زي ابني برضه)، الجملة دي مكانتش مجرد كلام لطيف وخلاص، دي كانت حقيقة لمستها في التعامل اليومي بعد كده؛ دايمًا كان داعمني، بيهتم بتفاصيلي، وبيسأل عنّي وبيوجّهني».
وعن أكثر النصائح التي تركت أثرًا عميقًا في شخصيته، قال بشر: «في موقف معين، نصحني بنصيحة فضلت معايا لحد النهارده، قالّي: (مفيش حد كامل… خد الحلو اللي يناسبك، وسيب الوحش أو اللي مش لايق عليك. ده اللي هيشكّل شخصيتك وثقافتك يا يوسف.) النصيحة دي علّمتني درس عمري ما هنساه: إنك تبني نفسك من التجارب والناس، وإنك تختار اللي يناسب مبادئك وأسلوبك. ومن يومها وأنا بقيت أتعامل مع كل تجربة بوعي ونضج أكبر».
وأكد يوسف بشر أن علاقته بالكابتن سيد عبد الحفيظ لم تنتهِ برحيله عن الأهلي، مضيفًا: «فضلت دايمًا على تواصل معاه حتي الان، حتى لما جاء لي عرض احتراف خارج مصر بعد تجربتي مع الأهلي، كنت أول حاجة بعملها إني بستشيره، ورأيه كان دايمًا واضح، صادق، ومن القلب».
واختتم يوسف بشر تصريحاته قائلًا: «كابتن سيد عبد الحفيظ مش مجرد مدير كرة، هو مدرسة اداريه و قيادية وإنسانية استثنائية. بيعرف يحتوي الناس، وبيقيّم الأمور بدون كلام كتير، ويوجّه بحكمة، عقليته فيها مزيج نادر جدًا بين الحسم والهدوء، وده شيء صعب جدا تلاقيه في شخص واحد، وبكل صدق، أنا مدين له بالكثير، وكل خطوة باخدها دلوقتي في مسيرتي فيها جزء من طريقة تفكيره، من قيادته، ومن احترامه الكبير جدًا للتفاصيل»
