يوسف بشر يكشف كواليس انضمامه للأهلي: لحظة لا تُنسى وكولر شخصية استثنائية
كشف المدرب المصري يوسف بشر الذي خاض تجربة فنية رفقة الجهاز الفني السابق للمدير الفني السويسري مارسيل كولر، كواليس انضمامه إلى النادي الأهلي، والتجربة الفريدة التي عاشها داخل نادي القرن، مؤكدًا أن دخوله الأهلي كانت لحظة فارقة في مسيرته.
يوسف بشر يروي تفاصيل رحلته مع الأهلي
وقال بشر في تصريحات خاصة لموقع «الجمهور» الإخباري: "أول فرصة ليا في الأهلي جات بعد فترة ناجحة مع الاتحاد السكندري وتجربة مع زوران مانولوفيتش، والانضمام للأهلي كان وراه دعم كبير من أكتر من طرف، خصوصًا الوكالة اللي بتمثل كولر، والعميد علاء صلاح المنسق الأمني لفريق الكرة، اللي كان له فضل كبير و طبعا الكابتن سيد عبد الحفيظ مدير الكره و مارسيل كولر المدير الفني".
وأضاف يوسف بشر: "أول مقابلة لي كانت مع كولر، وكان لقاء مؤثر جدًا، حسّيت وقتها إني قدام إنسان بسيط ومتواضع، عنده حضور يخليك ترتاح من أول لحظة وبعدها التقيت بالكابتن سيد عبدالحفيظ، وده اللقاء اللي حسّسني إني دخلت نادي القرن فعلًا".
ووصف بشر لحظة دخوله ستاد التتش التاريخي بمقر النادي بالجزيرة لأول مرة بأنها لحظة "مليانة مشاعر" قائلاً: "كان إحساس بالفخر والرغبة في إني أكتب فصل جديد لنفسي وسط تاريخ النادي الكبير، اللحظة دي كانت رمز لبداية حقيقية في مسيرتي كمدرب".
وأوضح يوسف بشر تفاصيل لقائه الأول مع مارسيل كولر أنه كان يومًا لا يُنسى، وقال: "كنت محضر نفسي كويس جدًا، وبمجرد ما قعدت معاه، حسّيت براحة غريبة، بدأ يكلمني بشكل بسيط، ودمه خفيف جدًا.. سألني عن نفسي، وكان مركز مع كل كلمة بقولها وحسيت إنه إنسان فعلا قبل ما يكون مدرب، وده فرق معايا جدًا".
وأضاف بشر: "فترتي في الأهلي كانت فيها تحديات كتير، خصوصًا إني كنت بدخل منظومة كبيرة جدًا وليها نظام دقيق وواضح، وكنت حريص إني أتأقلم بسرعة. كنت بشتغل على نفسي كل يوم علشان أوصل لأفضل مستوى، وأثبت إني فعلاً أستحق الفرصة دي و أكتر".
وأكد يوسف بشر: "من أول يوم كل الناس في النادي كانوا بيستقبلوني بترحاب حقيقي، ومفيش حد بخل عليا بأي حاجة أو معلومة، الجو هناك فعلاً يخليك تحس إنك واحد من العيلة، وده كان بيسهّل عليا أي صعوبة ويديني حافز أدي أكتر".
وتابع بشر: "أكتر حاجة فرقت معايا كانت الأجواء في النادي، فكرة إنك كل يوم وسط ناس هدفها النجاح طول الوقت، وكل شخص فيهم بيقوم بدوره بشكل احترافي جدًا، ده كان بيحفزني أطور من نفسي باستمرار، وعلّمني قد إيه النجاح بيجي من التزامك وتركيزك في كل تفصيلة".
واختتم يوسف بشر حديثه: "التجربة دي خلتني أدرك إن اللي عايز يوصل لمكانة كبيرة لازم يكون مستعد دايمًا، وميخافش من التحديات، لأن في النهاية الفرص الكبيرة بتيجي للي جاهز لها، وأنا محظوظ إني عشت تجربة الأهلي، واللي هتفضل محطة مهمة في مسيرتي مهما كانت الخطوة الجاية".
