أمين الفتوى يشرح روشتة لأداء الصلاة في وقتها
تلقت دار الإفتاء المصرية، سؤالًا من أحد شباب محافظة المنيا، حيث استفسر فيه عن كيفية الانتظام في الصلاة.
وأجاب الدكتور هشام ربيع، أمين الفتوى بدار الإفتاء المصرية، على السؤال، وهو : "كيف ألتزم بالصلاة؟ أعمل إيه عشان أحافظ عليها؟".
كيف تلتزم في صلاتك؟
وقال أمين الفتوى بدار الإفتاء المصرية، خلال حلقة برنامج "مع الناس"، المذاع على قناة الناس، اليوم الإثنين: "إن أول خطوة نحو الصلاة هي إنك تصاحب الناس اللي بتصلي، صاحب من يُصلي، لأن الصحبة الصالحة هي مفتاح الالتزام".
خطوات للالتزام في الصلاة
وأوضح ربيع، أن الالتزام بالصلاة لا يبدأ فقط من الإرادة الفردية، بل من البيئة المحيطة والدائرة الاجتماعية التي يعيش فيها الإنسان، مضيفًا: "لو صحبتك كلها بتصلي، طبيعي هتحافظ معاهم على الصلاة، وهتحبّها وهتلاقي نفسك بتنتظر وقتها، مش بتهرب منها".
وشدد أمين الفتوى بدار الإفتاء المصرية، على أهمية الابتعاد عن السلبية، ومرافقة الإيجابيين، قائلاً: "قلت قبل كده، وده كتبته بنفسي، إن الإنسان لازم يصاحب من لم يكن فيه سلبية، لأن الصحبة بتأثر على القلب والسلوك والعبادة".
وفي نفس السياق، كان قد أرسل الدكتور هشام ربيع، أمين الفتوى بدار الإفتاء المصرية، مسبقًا رسالة صادقة ومؤثرة لكل من يشعر بالحزن أو الذنب لأنه ترك الصلاة ويريد العودة، لافتا إلى أن الرجوع إلى الله لا يحتاج منك إلا نية صادقة وقلبًا يشتاق للقاء ربه.
قول يا رب
وأوضح خلال حلقة برنامج "مع الناس"، المذاع على قناة الناس، أن هناك ثلاث خطوات بسيطة وعميقة في نفس الوقت، لكل من كان قريبًا من ربنا وانشغل أو ابتعد وخاصة عن الصلاة، وهى "قول: (يا رب) بقلبك أو بلسانك، وقولها بأي طريقة.. أهم حاجة تكون من القلب، لأن ربنا ما بيردش حد خبط على بابه، وأول ما ييجي وقت الصلاة الجاية، هتلاقي نفسك بتقوم تتوضى وتصلي لوحدك، من غير ما حد يقولك".
راجع دايرة علاقاتك
وتابع: "ثاني حاجة راجع دايرة علاقاتك، الناس اللي حواليك ليهم تأثير كبير.. شوف صحابك، زمايلك، الناس اللي بتكلمهم كل يوم، وخلى بالك الصحبة الصالحة ممكن تشدك لربنا من أقصى البعد لأقصى القرب، والعكس صحيح".
وأضاف : "الدعاء والدعاء ثم الدعاء: ادعي في أي وقت وفي أي مكان.. ربنا بيسمع وبيستجيب، حتى وانت على المعصية".
وتابع: "لا تحزن.. كلنا بنجاهد نفسنا، كلنا بنقع وبنقوم، المهم إنك ترجع. مافيش حد معصوم، وربنا بيحب العبد اللي بيرجع له كل مرة، الصلاة مش بس عبادة، دي صلتك بربك، افتح الباب تاني، وهتلاقيه مستنيك".
