تامر حسني يعلق على إجراء نجله آدم عمليتين جراحيتين بعد انفجار الزايدة
كشف الفنان تامر حسني، تطورات الحالة الصحية لنجله أدم، بعد خضوعه لعمليتين جراحيتين بسبب انفجار الزايدة بشكل مفاجيء.
وكتب تامر حسني، عبر صفحته على موقع التوصل الاجتماعي «فيسبوك»، قائلًا: «أنا مش عارف أشكركم إزاي على كمّ الدعوات اللي دعيتوها لربنا لشفاء آدم ابني اللي جاتلي منكم هنا وعلى تليفوني وتليفونات كل المحيطين بيا هو عمل عمليتين كبار بسبب انفجار الزايدة المفاجئ، اللي كانت أعراضه سخونية عادية بس».
وتابع تامر حسني: «وبقولكم كده عشان تبقوا حريصين مع نفسكم أكتر ولولادكم مش كل سخونية تقولوا ده شوية برد وخلاص لا روحوا اكشفوا كويس واعملوا سونار على البطن والزايدة مرة و2 عشان برضو ساعات مش بيبان ولازم الدكتور يضغط بطريقة معيّنة، تقريبًا أقوى شوية عشان يعرف لإني سمعت كتير اليومين دول إن الزايدة خادعة».
وأضاف تامر حسني: «اطمنوا كذا مرة قبل لحظة انفجارها عشان بجد مشاكل بتحصل بعدها كبيرة ومحزنة أوي وحبيبي آدم عمل عمليتين صعبين أوي عليه وبدعواتكم مستنيين النتايج تكون خير يارب ويعدي مرحلة الخطر يارب».
وحرص تامر على الدعاء لـ ابنه: «بحق كن فيكون اشفيه وعافيه، هو وكل ولادنا بس هو راجل وهيتحمل وإن شاء الله ربنا يكرمه ويعافيه ويحفظه هو وإخواته ويحفظ كل ولادكم يارب وأحب أقول تاني شكرًا من كل قلبي على دعواتكم».
ووجه رسالة شكر لكل من سأل على نجله قائلًا: «أنا شايف قلب كل حد فيكم وهو بيدعي بصدق متشكر أوي يا جماعة شكرًا لكل اللي اهتم وسأل عن ابني ودعاله هنا أو على التليفون واللي طلعوله صدقات لشفائه من غير ما يعرفونا شخصيًا، أنا مش لاقي كلام أشكركم بيه وأنا برضو بدعيلكم وبقول لكم مثلها وأضعاف أضعافها وربنا يحفظكم ويحفظ أولادكم قادر يا كريم».
