محمد العمروسي يعلق على أزمة محمود حمدان وأحمد أدم
خرج الفنان محمد العمروسي، للتعليق على أزمة المؤلف محمود حمدان والفنان أحمد آدم، التي أثارت جدلا على مواقع التواصل الاجتماعي خلال الساعات الماضية، بعد رفض الأخير العمل معه في الماضي.
وكتب محمد العمروسي، عبر صفحته على موقع التواصل الاجتماعي فيسبوك قائلا: «البوست ده حتى لا ننسى الفضل بيننا الأستاذ أحمد آدم أستاذ ونجم كبير طاقة فنية وثقافية كبيرة ومن أعلام الفن المصري وليه رصيد كبير و الأعمال اللي استمتعنا بيها».
وأضاف: « وليه في رقبتي كلمة حق أنا اشتغلت مع أستاذ أحمد سنة 2005 مسرحية برهومة على مسرح جلال الشرقاوي، وقتها كنا بندرس في معهد فنون مسرحية والدكتور جلال هو اللي رشحنا للشغل ولما اشتغلت معاه وكنت حابب إني أضيف حاجة لدوري روحت وقولتله إنى عايز أعمل حاجة في الدور، وقالي سمعني ولما سمع قالي حلو تعالا نجرّبه النهاردة فعلا قولنا والناس ضحكت وخدنا تسقيف كبير من الناس فرح وهو على المسرح قالي حلو ده نثبته».
وتابع محمد العمروسي: «وفي نفس السنة كنت بعرض معاه وذهبت إلى بني سويف وحصل الحادث الكبير حريق مسرح بني سويف، وكان من أوائل الناس اللي جتلي المستشفى ومكنش عايز يمشي وكان كل يوم يطمن عليا وبعتلي إيهاب مدير أعماله بمبلغ كبير علشان العلاج، ولما رفضت آخد المبلغ إيهاب كلمه وقاله محمد مش عايز ياخد الفلوس، كلمني وقالي أنا عمك وزي أبوك خدهم قولتله والله أنا معايا أهلي هنا والحمد لله ولو احتاجت أي حاجه إنت أول حد هكلمه».
وأوضح العمروسي، كلامه قائلا: « اللي أنا عايز أقوله من البوست الطويل ده إننا كلنا بنقع وبنقوم أنا عارف إن صديقي وأخويا المؤلف محمود حمدان متضايق من موقف حصل معاه زمان وعارف إن ممكن يكون أستاذ أحمد كان غلطان في موقفه لكن اللهم لا شماته لأن لو دامت لغيرك مكنتش جتلك وكلنا اتعرضنا لظلم كبير في بداية حياتنا لكن المسامح كريم، وأستاذ أحمد قيمة وقامة كبيرة وأرجو من كل القائمين على الفن المصري النظر والاهتمام بقامتها الفنية».
