نجلاء نادر تكتب.. ابني مش شقي هو مشتّت! ازاي أساعده يركز؟
في أطفال كتير بيتقال عليهم إنهم شقيين، مش بيقعدوا في مكان، مش بيركزوا، بينسوا كتير، وساعات بيتوصفوا إنهم مش بيحبوا المذاكرة. بس الحقيقة إن في حالات كتير بيكون الطفل عنده "تشتت انتباه" ومش واخدين بالنا.
يعني إيه تشتت انتباه؟
يعني الطفل بيبقى صعب عليه يركّز في حاجة واحدة لفترة طويلة. بيبدأ يعمل حاجة وبعد شوية يسيبها، ممكن يسرح بسرعة، أو يتوه لما يسمع تعليمات، وينسى اللي مطلوب منه.
إيه اللي ممكن يسبب تشتت الانتباه؟
ممكن يكون سبب بيولوجي زي فرط الحركة (ADHD).
أو نفسي زي القلق أو التوتر.
كمان الأجهزة والشاشات الكتير بتأثر على التركيز.
لو الطفل مش بينام كويس أو أكله مش متوازن.
وأوقات البيئة حواليه بتكون مليانة دوشة أو مفيش روتين واضح.
طب اعرف منين إن ابني فعلاً مشتّت؟
هتلاقيه مش بيكمل حاجة للآخر، بينسى بسرعة، وسارح طول الوقت.
المدرسين في المدرسة ممكن يلاحظوا إنه مش منتبه أو دايمًا بيتكلم أو بيتحرك.
أحسن حل إنك تستشيري أخصائي نفسي أطفال أو تخاطب، وهما يعملوا تقييم دقيق.
أتعامل إزاي معاه؟
في البيت:
اعملي له جدول يومي منتظم.
اقسمي الواجبات أو المهام لحاجات صغيرة.
لما ينجح في حاجة، شجعيه بكلمة حلوة أو مكافأة بسيطة.
قللي استخدام الشاشات، خصوصًا قبل النوم.
وفرّي له مكان هادي للمذاكرة.
في المدرسة:
المدرس يقرب منه وهو بيشرح ويقسّط المهام.
يقلل من الحاجات اللي بتشتت حواليه.
يستخدم وسائل تعليم مرئية زي الصور والألوان.
ويدي له فواصل قصيرة بين كل نشاط والتاني.
رسالة لكل أم وأب:
الطفل اللي عنده تشتت مش قليل ذكاء، ولا كسلان. هو محتاج حد يفهمه ويقف جنبه. ومع الوقت والدعم، تركيزه بيتحسّن، ونقدر نساعده يكتشف قدراته.