عمرو محمود ياسين يوجه رسالة لمجلس الزمالك بعد توديع الكونفدرالية.. ماذا قال؟
وجه المؤلف عمرو محمود ياسين، رسالة إلى مجلس إدارة نادي الزمالك، بعد خسارته من نادي ستيلينبوش الجنوب أفريقي، وتوديع الزمالك منافسات الكونفدرالية الأفريقية، اليوم الأربعاء، بل طالب من مجلس الإدارة الرحيل من أجل النادي وجماهيره.
وعلق عمرو محمود ياسين عبر حسابه الشخصي على فيسبوك قائلاً: يا جماعة صدقوني وبإخلاص شديد بقولها نادي الزمالك محتاج إدارة تانية خالص، اللي بتعمله إدارة النادي في جمهوره صعب جدًا وما حدش يقول لي ما لكش دعوة وخليك في نفسك لأن أنا بعتبر نادي الزمالك جزء من تكويني كمواطن مصري.
وأضاف: صدقوني أنا دايما بيهمني إني أشوف نادي الزمالك قوي، أنا مش من الجمهور اللي بيعتبر أن فشل الزمالك وانحداره في المستوى شيء إيجابي أو يسعدني، بالعكس هو أصلا كلما ارتفع مستوى نادي الزمالك ارتفع مستوى النادي الأهلي وارتفع مستوى كرة القدم في مصر، وما تقوليش روح قول للخطيب ولا روح قول للنادي الأهلي هو اللي بيوقعنا لأن باختصار طب وحضرتك فين لو اللي بتقوله ده صحيح انت كنادي وكمجلس إداره وكرجال نادي الزمالك انتم فين من ده؟.
وتابع: كل اللي حصل مع ملف أحمد زيزو غلط في غلط من أول لما فشلوا في بيعه لما جات لهم العروض طمعا في التجديد له، مرورًا بعدم التجديد له وفشلهم في ده، انتهاء باستبعاده من خططهم فيما تبقى له من مدة في العقد وطبعا مش هننسى المنظر الساذج العبيط واللقطة العبثية مع صورة زيزو وهي بتسقط على الأرض وناس غريبة كدة فاكرينها صورة طاغية من طواغيت حكم ديكتاتوري مثلًا وبيدوسوا عليه كأنهم أسقطوا شاوشسكو بجد يا جماعة حرام اللي بيحصل في نادي عظيم وعريق زي ده.
الجدير بالذكر أن آخر أعمال عمرو محمود ياسين الفنية كانت في رمضان الماضي من خلال مسلسل “وتقابل حبيب”، بطولة ياسمين عبد العزيز وكريم فهمى، وخالد سليم، ونيكول سابا، وأنوشكا، وبسنت شوقى، وصلاح عبد الله، حنان سليمان، رشوان توفيق، محمود ياسين جونيور، منة عرفة، بسنت أبو باشا، إنجى كيوان، بتول الحداد، كريم عبد الخالق، حمدى هيكل، ريم رأفت، وعدد آخر من الفنانين، من إخراج محمد الخبيرى وإنتاج شركة سينرجى.
