الفنانة إيمان السيد ترد على منتقديها بسبب ظهورها في مسلسل وتقابل حبيب
بعد الانتقادات التي تعرضت لها بسبب دورها في مسلسل "وتقابل حبيب"، قررت الفنانة إيمان السيد الرد على تلك الانتقادات التي وجهت لها، حيث أكدت أنها تستوعب ذلك وتتفهمه، وكشفت أنها كانت ستعتذر عن المسلسل لكنها شاركت فيه تقديرًا للفنانة ياسمين عبدالعزيز.
وكتبت إيمان السيد عبر حسابها الشخصي على فيسبوك: «أنا فاهمة ومدركة جدا أن دوري في العمل نفسه مش عاجبك كمشاهد ودا حقك جدا، وأنا شخصيا ببقى عارفة ومدركة لما بعمل دور مش حساه وببقى متفهمة طالما إنك تبدي رأيك بموضوعية واحترام».
وأضافت: «وعارفة كويس إن ممكن أي حاجة كويسة عملتها قبل كدا تتنسي في ثانية في وسط هجوم بسبب دور لم ينل استحسانك ودي حاجة تعلمتها مع الوقت إني أتوقع أي شيء».
وأوضحت: «وأنا شخصيا اتعلمت في حياتي ألا ألقي بأخطائي على شماعة الغير، لاني لو عملت كدا مش ها تقدم خطوة في حياتي، وانا كبيرة كفاية إني أتحمل دايما نتيجة اختياراتي واكيد بتضايق شوية لاني طول عمري باحفر في الصخر علشان اتقدم خطوة أو على الأقل أثبت مكاني، ولكن مع الخبرة في الحياة وفي شغلي اتعلمت أتجاوز المواقف وافكر في اللي جاي ومتفائلة ودايمًا ظني خير في ربنا سبحانه وتعالى».
واستكملت: «وكنت دايما لما حد يعرض عليا دور صغير بقول انا ممكن أعمل دا مع ياسمين فقط لان الناس عارفة رصيدنا مع بعض، وعمري ما قرأت قبل كدا تعليق بيقول أن حد بيفرضني على العمل غير المرة دي ولا قرأت كلام مؤذي زي المرة دي لدرجة أن زميلة ليا في العمل كلما أبدت رأيها في شيء على السوشيال ميديا ألاقي نفسي بتهاجم في الكومنتات حتى لو كان البوست بتاعها ليس له علاقة بالعمل نفسه وأنا قبل ما ابتدي تصوير كلمت أستاذ عمرو مؤلف العمل واللي بحترمه جدا وكنت بعتذر عن الدور».
وتابعت: «وبعترف اني عملت دا في توقيت سئ وماكانش ينفع وهو شخصيا قالي مش هينفع تعملي كدا مع ياسمين وقولت له أنا ممكن أجيلها مشهد واحد في مسلسل بس أكون حاسة المشهد وفي النهاية اشتغلت لأن توقيتي زي ماقلت كان غلط وأنا سعيدة بنجاح العمل ومبسوطة بياسمين وفرحانة علشانها لانها تستاهل كل خير وفي النهاية تعلمت».
أبطال مسلسل وتقابل حبيب
مسلسل "وتقابل حبيب" من بطولة ياسمين عبد العزيز في دور "ليل الحسيني"، كريم فهمي في دور "فارس أبو العزم"، خالد سليم في دور "يوسف أبو العزم"، نيكول سابا في دور "رقية العسكري"، أنوشكا، صلاح عبدالله، حنان سليمان، رشوان توفيق، محمود ياسين جونيور، بسنت شوقي، من تأليف عمرو محمود ياسين وإخراج محمد الخبيري.
