محمد دياب يكشف تفاصيل "أشغال شقة جدا": 5 سنين بيتعرض على منتجين مصر كلهم ومش عاجبهم
بعد النجاح الكبير الذي حققه مسلسل "أشغال شقة جدا"، بطولة هشام ماجد وأسماء جلال، كشف المؤلف والمخرج محمد دياب، تفاصيل العمل والذي تم كتابته منذ أكثر من خمس أعوام ولم يجد مخرجه خالد دياب ومؤلفته شيرين دياب أى منتج أو بطل متحمس للعمل، لدرجة أنهما فقدوا الأمل في خروج العمل للنور.
وحكى "دياب" كواليس العمل قبل خروجه للنور، وذلك عبر حسابه الشخصي على الفيسبوك قائلاً: الحمد لله أشغال شقه للسنة الثانية ينجح نجاح ساحق، بس ورا النجاح ده قصه.
وأضاف: أشغال شقة ده لمدة خمس سنين بيتعرض على منتجين مصر كلهم، لكن مكانش فيه حماس ليه، تقريبًا معظم ممثلين مصر رفضوه رجاله وستات، ولما مرة نجم كبير تحمسله ومضاة فضل يطلب تغييرات لدرجه إنه في الآخر طلب أن شغل البطل يتغير وتتشال فكرة الشغالات!.
وتابع: في ناس مكانتش عاجباها الفكرة وناس كانت شايفة أننا بنكتب جد فمش هنعرف نعمل كوميدي، وناس عايزة الفكرة بس اللي يخرجها حد تاني غير خالد، رد الفعل ده كان هيجنن خالد وشيرين، إحساس صعب لما تبقي مؤمن بحاجه واللي حواليك مش شايفنها، ساعات ده بيشككك في نفسك.
وأشار: أربع سنين تعدي ومينزلش لخالد وشيرين أي مشروع، الضغط خلى خالد يقبل أن أشغال شقة يتعمل ولو بمخرج تاني، خالد لأي حد يعرفه هو أكتر إنسان كوميدي تقدر تعرفه وأنا وشيرين كان عندنا قناعه أنه من أشغال شقه هيطلع كوميديته الخاصة اللي هتكسر الدنيا.
واستكمل محمد دياب حديثه: بصعوبه شديدة رجع خالد وشيرين يحاولوا ورا المسلسل، لغايه لما جاء هشام ماجد اللي آمن بيه وبخالد كمخرج وجاءت شركه الأنتاج (اي برودسيرز) اللي هيأتله أسباب النجاح.
وأوضح: أشغال شقه نجح واستخدم توليفه كتابيه مختلفة مش قائمة على الإيفيهات، وخالد كمخرج طلع عنده صوت وشخصيه ورؤية بصرية باينة في كل مشهد، أنا طول عمري بتفرج على كوميديا المسلسلات وابتسم كام مرة وابقي مرضي، بس أن الواحد يضحك بصوت ولغايه لما بطنه توجعه وده يحصل كل حلقه، فمتخيلتهاش تحصل في مسلسل.
واختتم: بالنسبالي المخرج والمؤلف الشاطرين هما اللي بيعملوا حاجه أحس إني معرفش أعملها وأنا لما بتفرج على أشغال شقه ببقي متأكد إني معرفش أعمل منه مشهد، فعلاً كل تأخيرة وفيها خيرة.
مسلسل "أشغال شقة جدًا" تأليف وإخراج خالد دياب، وتشاركه التأليف شقيقته شيرين دياب، وبطولة هشام ماجد، وأسماء جلال، ومصطفى غريب، وشيرين، وسلوى محمد علي والعديد من ضيوف الشرف.
