عمرو محمود ياسين عن مسلسلات رمضان: حاسس إني مظلوم في المنافسة السنة دي
علق المؤلف عمرو محمود ياسين على الجوائز التي يطلقها أبطال مسلسلات رمضان، سواء أحمد العوضي أو مي عمر وكذلك محمد رمضان ببرنامجه "مدفع رمضان"، وأكد أنه لا يقدر على إطلاق جوائز بـمسلسله "وتقابل حبيب" بطولة ياسمين عبد العزيز.
وقال عمرو محمود ياسين عبر حسابه على الفيسبوك: بصراحة أنا حاسس إني مظلوم في المنافسة السنة دي، مسلسلات كتير عاملين مسابقات وجوايز قيمة، والجمهور متفاعل، وأنا لا عندي مسابقات ولا عندي جوايز! يعني حتى لو فكرت أعمل مسابقة، هسأل إيه؟ ‘مين بطل المسلسل؟’ وأهدي الفايز إيه؟.
وأضاف: أنا كده مش عارف أنافس الصراحة، بس لما بفكر كده، زمان المسلسلات كانت بتنجح من غير كل ده، حد فيكم خد عربية لما شاف سوق العصر؟ أو كسب دهب لما تابع ليالي الحلمية؟ النجاح الحقيقي بييجي من الحكاية الحلوة اللي تفضل مع الناس، ده اللي افهمه ولا الدنيا اتغيرت ولا ايه وانا اللي مش دريان؟.
واختتم قائلاً: عشان كده، بجائزة أو من غير، مستني محبي و جمهور الدراما في رمضان مع مسلسل وتقابل حبيب… لأن الحكاية الحلوة هي اللي بتكسب في الآخر!.
مسلسل "وتقابل حبيب"، من بطولة ياسمين عبدالعزيز في دور "ليل الحسيني"كريم فهمي في دور "فارس أبو العزم"، خالد سليم في دور "يوسف أبو العزم"، نيكول سابا في دور "رقية العسكري"، أنوشكا، صلاح عبدالله، حنان سليمان، رشوان توفيق، محمود ياسين جونيور، بسنت شوقي، من تأليف عمرو محمود ياسين وإخراج محمد الخبيري.
تدور أحداث المسلسل حول "ليل الحسيني"، سيدة ثرية تكتشف خيانة زوجها "يوسف أبو العزم" وزواجه سرًا من "رقية العسكري" بعد انفصالها عنه، تدخل في علاقة حب مع "فارس أبو العزم"، شقيق طليقها، مما يضعها في صراعات عائلية وعاطفية معقدة.
