«بيهزر معايا وهو اللي عازمني».. مصطفى جاد يعلق على الفيديو المتداول لـ أحمد حلمي

بعد الهجوم الذي تعرض له الفنان أحمد حلمي مؤخرا، خرج الملحن مصطفى جاد، عن صمته ليحسم الجدل حول تعمد حلمي التقليل من شأن مصر أمام الجمهور السعودي، أثناء عرض مسرحيته الجديدة “بني آدم”.

ونشر مصطفى جاد، مقطع فيديو عبر حسابه الرسمي بموقع التواصل الاجتماعي "إنستجرام"، قائلا: "أنا عندي شهادة حق، وشهادة الحق مينفعش نكتمها ولا ينفع نفكر تتقال ولا لأ، ولا ينفع تفكر تستنى عليها ولا لأ، وبجِملة سوء النية والاستباحة والاستسهال اللي بقى عند الناس، لمجرد إن شخص معاه تليفون أو قال حاجة على هواه، وأنا استنيت الأيام اللي فاتت عشان محدش يقول إني بركب تريند، ولا عايز أدخل في الخناقة دي، ولا بحب اللي بيعملوا كدا بمنتهى الوضوح".

تعليق مصطفى جاد على أزمة أحمد حلمي

وأضاف: "أنا اسمي مصطفى جاد، ملحن ومنتج موسيقي مصري، وبشتغل من 2011، وعندي شركتين إنتاج اشتغلت من خلالهم مع أكبر شركات في العالم مش بس الوطن العربي، ومبحبش أشتغل بالطريقة دي، لكن الظروف تحكم، وأنا بتكلم عن الهجوم اللي حاصل على أحمد حلمي وعن شخصي أنا كمان، وأنا عايز أرد غيبة الراجل المحترم أحمد حلمي".

وأردف جاد: "الموضوع بدأ إن زوجتي النجمة كارمن سليمان طلبت مني إنها تحضر مسرحية أحمد حلمي، وأنا كلمته وروحنا حضرنا المسرحية، وحصل الموقف اللي أنتم شوفتوه، ولازم نكون متفقين على حاجة، من حق كل مصري فينا إنه يغير على بلده، وإننا نكون إيد واحدة ضد أي حاجة تهدد بلدنا لأن كلنا بنحب مصر، ومينفعش حد يقول أنا وطني أكتر منك إلا لو كان حارب وأنا محاربتش، ولازم كلنا يكون عندنا الغضب الرهيب دا لما يكون فيه سبب واضح، والموضوع ينهيه إن أنا وحلمي نعرف بعض من 5 سنين، اتقابلنا في مكان ومن وقتها فيه تواصل، وحلمي نجم كبير أنا بحبه وبحب هزاره، والهزار يخصني وكان في محله، ومحبش أقول كدا ولكن أنا أقدر أشتري مسرح".

واختتم جاد، حديثه قائلا: "والقصة إن المسرحية يوميها اتأخرت على الناس، والناس في القاعة كانوا متضايقين من التأخير، والراجل طلع عشان يهدي الناس شوية، عشان كدا ارتجل، ومن ضمن الارتجال إنه طلع بشخصيته في المسرحية، ونزل للناس ومن قبلي أنا وكارمن كان بيتكلم مع كذا حد وبيهزر معاه، عشان يقول ضمنيًا إنه بيعتذر لأنه اتأخر على العرض، وقال الإيفيه اللذيذ اللطيف اللي مفيهوش أي نوع من الإهانة عشان الراجل هو اللي عازمني، هو عازم ملحن ومنتج عنده القدرة يقفل المسرح لأصحابه وعائلته، بحب الناس لينا وتقدير الناس لينا، مش قصة قادر ماديًا أو لأ ومينفعش نتكلم باللغة دي".