«الفيديو قديم وعايزين يطلعوه ماسوني».. مروة صبري عن أزمة إفيه أحمد حلمي

أثار الفنان أحمد حلمي، جدلا كبيرا على مواقع التواصل الاجتماعي خلال الفترة الأخيرة، بعد تداول مقطع فيديو من مسرحيته الجديدة «بني آدم»، وهو يسخر من الملحن مصطفى جاد، بسبب جلوسه في الصف رغم جنسيته المصرية.

وتعرض أحمد حلمي، للعديد من الانتقادات، لذلك خرجت الإعلامية مروة صبري عن صمتها، وكشفت تفاصيل الموقف الذي حدث بينه وبين الملحن مصطفى جاد وزوجته الفنانة كارمن سليمان أثناء عرض المسرحية.

تعليق مروة صبري على أزمة أحمد حلمي

وكتبت مروة صبري، عبر حسابها بموقع التواصل الاجتماعي «فيسبوك»: «فعلا السوشيال ميديا دى ملهاش كتالوج.. فيه فيديو بقاله 3 أسابيع موجود بس اللجان الإلكترونية قررت تطلعه تريند من يومين وكله عمال يعمل شير من غير ما يفهم.. وهو فيديو للنجم المحترم الراقي أحمد حلمى في مسرحيته الأخيرة بالسعودية اللى عمرنا ما سمعنا عنه حاجة ولا ليه مشاكل مع حد ولا بيتكلم على حد ولا حتى ليه وجود على السوشيال ميديا».

وأضافت: «في الفيديو كان بيهزر فيه مع ناس يعرفهم يعنى أصحابه يعرفهم.. (المطربه كارمن سليمان وجوزها الملحن مصطفى جاد).. ونزل من على المسرح يهزر معاهم  فرحب بيهم في الأول وبعدين هزر مع كارمن الأول وبعدين هزر مع مصطفى جوزها وقاله (أنت قاعد في الصف الأول وأنت من مصر.. يبقى أنت أكيد معزوم)».

واختتمت مروة صبري حديثها عن أزمة أحمد حلمي، قائلة: «فاللجان تقطع الفيديو اللى بينه وبين مصطفى بالجملة دي بس عشان يطلعوا أحمد حلمى على المسرح ونطلعه بيغلط في بلده وملوش خير فيها.. وعلى فكرة ده فيديو قديم وبقاله 3 أسابيع وحاولوا يطلعوا الراجل ماسونى لقوها مجبتش شير كتير فقالك بيشتم مصر وبيقلل من بلده وأهل بلده.. محتاجين شويه تجديد في الترندات يا جماعة الفترة اللى جايه».