الفنانة انتصار: عليا أقساط.. ولازم ننسى كلمة براند ونعيد التدوير

وجهت الفنانة انتصار، نصيحة للسيدات بضرورة إعادة تدوير الملابس والأطعمة في المنزل للحد من استهلاك النفقات.

وقالت انتصار في مقدمة برنامجها “من غير نفسنة” الذي تقدمه مع الفنانة بدرية طلبة ونوليا، عبر شاشة قناة “هي”: عليا أقساط وحصل غلاء والدنيا اتلغبطت شوية، يعني إيه أنزل السوبر ماركت وعاملة حسابي أجيب حاجات الشهر، وألاقي الأسعار أغلى من اللي عاملة حسابي عليه.

وتابعت: متفتكروش يا جماعة إن الحاجات اللي عليها عروض دي لله، لأ دي بتكون هتخسر وتبوظ بعد 6 أو 3 شهور، وعلشان كده بيقولوا العلبتين بسعر واحدة وخد التالتة، والناس بتجري في رمضان والعيد وتجيب الحاجة وتخزن.

وأضافت: الست لازم تكون مدبرة، يعني زمان كان يبقى عندي هدوم وأنزل أجيب بلوزتين كده، دلوقتي مبشتريش، ده في حاجات جديدة متلبستش في الدولاب أو اتلبست مرة، ليه أنزل كل صيف أجيب حاجات جديدة؟

واستكملت: برا مصر مفيش عنده فاجعة الشراء زي هنا، لازم ننسى كلمة براند، ونعمل إعادة تدوير للحاجات اللي عندنا في البيت، والجو بتاع الاستهلاك بتاع زمان مبقاش موجود.