فتوح أحمد: كان عندي سقطات على شخصيتي في «جعفر العمدة»

«هو السبب في كل اللي حصل لـ وداد».. بهذه الكلمات وجه الجمهور اللوم لـ الفنان فتوح أحمد، الذي جسد شخصية «فتوح» في مسلسل «جعفر العمدة»، الذي عرض في رمضان الماضي، بسبب التربية الخاطئة لابنته «وداد»، التي جسدت دورها الفنانة جوري بكري.

وخطف «فتوح» أنظار الجمهور، بالعديد من الأدوار التي قدمها مؤخرًا على الساحة الفنية، أبرزها دور «صالح القط» في مسلسل «الأصلي»، للفنانة ريهام عبدالغفور.

وأجرى موقع «الجمهور» حوارًا مع الفنان فتوح أحمد، كشف خلاله كواليس أعماله الأخيرة، والتعاون مع محمد رمضان، وإليكم نص الحوار:

- من رشحك للمسلسل؟ وما أول دور عُرض عليك؟

الدور اللي اتعرض عليا في الأول مكنش دور «فتوح»، كان دور «صبحي تيرموستات»، ومحمد رمضان اللي رشحني لدور "فتوح"، والمخرج محمد سامي رشحني للمسلسل، لكن لما اختلفنا في الدور، محمد رمضان وقف معايا، واتكلم مع سامي إني أعمل «فتوح».

- كيف استطعت تكوين تفاصيل شخصية «فتوح»؟

محمد سامي صاحب الفضل في تقديمي لـ شخصية «فتوح» بهذا الشكل، وأنا ممثل محترف بشوف رغبات المخرج الشخصية، وهو عاوز إيه، وببدأ أكونها من عندي، وبنتفق وبنوصل مع بعض للشكل المطلوب.

- هل كان لديك ملاحظات على الدور.. وما هي ملاحظاتك؟

أنا كان عندي ملاحظات على شخصية «فتوح»، وهي إن مفيش حد في منطقة شعبية بنته تيجي بليل تخبط على بابه، ويروح راميها وميرضاش يدخلها، لكن محمد سامي قالي لأ فيه ناس كده، واتضح أن فيه ناس كده بس استثناءات، والحمد لله إن اللي زي «فتوح» قليلين.

- ما تعليقك على مشهد طرد «وداد»؟

محمد سامي عارف سيكولوجية المتفرج المصري، وعارف هو بيحب إيه، فبيعمل الحاجة اللي تلفت الانتباه، وتخطف المشاهد.

- حدثنا عن كواليس العمل مع الثنائي محمد رمضان وسامي؟

مكنش ليا شغل كتير مع محمد رمضان، لكن هو نجم كبير طبعًا، وليه جمهوره وناسه، ومحمد سامي هو المخرج، وهو أصل الحكاية واللوكيشين، بيحب الممثل أوي والناس بتحبه، وهو شاطر الصراحة، وغير إنه مخرج كبير، كواليسه حلوة.

هو الدور اللي عملته، وأنا ماليش أدوار تانية في المسلسل ممكن أعملها، والأدوار كلها مكتوبة بعناية، وكل الناس كانت كويسة في أدوارها، ومفيش ممثل كان قليل في دور، ودور «فتوح» هو أحسن دور ليا.

- ما تعليقك على ردود أفعال الجمهور على نهاية المسلسل؟

الجمهور بيحب النهايات السعيدة، عشان كده محمد سامي عمل النهاية ديه، وهي منطقية جدًا، لإن رغم الأكشن في المسلسل، إلا إن «جعفر» غير مُدان، مقتلش ومسرقش أو عمل أي فعل يعاقب عليه، عشان تقولي ازاي البطل مأخدش جزائه.

- ما تعليقك على توقع الجمهور بـ خيانة «نعيم» لـ «جعفر»، ولماذا استكتروا صداقتهم النظيفة؟

مفيش أي مبرر إن الناس كانت تتوقع إن «نعيم» خان «جعفر»، فـ «نعيم» غير إنه دراع جعفر اليمين، فهو كمان يبقى ابن خاله، فهما قرايب أساسًا، ومفيش أي مبرر، ومعرفش الحقيقي توقعات الناس ديه جت منين، إلا لو قالو مثلًا إن تربيته زي «وداد» مش كويسة، لا بردو «نعيم» كان العكس، أما عن الصاحب الوفي، فهم في الحقيقة أه قلوا ومبقاش فيه، الصاحب اللي أقدر أثق فيه أوي، وأقوله أسراري، وللأسف الظروف الإقتصادية وظروف الحياة، خلت العملة ده بقت نادرة حاليًا.

- ما الدور الذي ترغب في تقديمه خلال الفترة المقبلة؟

مفيش دور معين، لكن أحب أقدم أي دور فيه جديد، أو الأدوار اللي أقدر أعملها كويس وتخطفني، إنما الأدوار التقليدية، محبش أقدمها.

- من المخرجين الذين تفضل العمل معهم؟

كل ما بشتغل مع مخرج جديد، خاصةً الشباب بستمتع أكتر، لإن كل المخرجين الشباب اللي اشتغلت معاهم مؤدبين جدًا ومهذبين، ودارسين، وبيحترمونا بشكل غير عادي، وبيحترموا كمان الممثلين الكبار في السن، وهما كمان عندهم فكر وتصور جديد، فالواحد كل ما بيشتغل مع مخرج سواء كبير أو صغير لأول مرة، بتبقى متعة بالنسباللي، وحتى لما بيكون مخرج لسه صغير، بكون متوتر، وكإني أول مرة أمثل، وببقى عاوز أثبتله إن اختياره صح، وأن كنت محظوظ السنة دي، إني اشتغلت مع المخرج أحمد حسن، ومحمد سامي، وإسلام خيري.

- ما سر نجاح مسلسل «الأصلي»؟

كان من وجهة نظري إن مسلسل «الأصلي» يتعرض في رمضان، لإنه حدوتة أسرية كويسة أوي، ومكتوب بحرفية عالية جدًا، إنما بردو كان حظه كويس إنه يتذاع لوحده ويتشاف كويس، والمخرج أحمد حسن، هو اكتشاف بالنسبالي، وبيشتغل بطريقة جديدة أول مرة أشوفها، وأغلب الكاست أول مرة اشتغل معاهم، لكن الحقيقي فوجئت بموهبتهم وأدائهم، وكلهم كانو محترفين، وده سر نجاح «الأصلي».

- ما سبب عدم مشاركة «الأصلي» في رمضان 2023؟

لإنهم بيختارو المسلسلات اللي فيها نجوم كبيرة، عشان الإعلانات، ودايمًا بيركزوا على الموضوع ده لإن الإعلانات مهمة بالنسبالهم، ودايمًا مسلسلات رمضان بتبقى محجوزة للسوبر ستار.

- ما أعمالك في الفترة المقبلة؟

كنت المفروض ابدأ تصوير مسلسل «صيد المغارب» قبل رمضان، لكن للإسف ظروف الإنتاج مسمحتش إننا نبدأ فيه، ولسه مش عارفين هنبدأ تصويره امتى، والمسلسل فيه ممثلين كتيرة أوي منهم، محمود عبد المغني، فردوس عبد الحميد، أحمد بدير، عفاف شعيب، أحمد فؤاد سليم، حجاج عبد العظيم، محمد الصاوي.

- ما تفاصيل شخصيتك في «صيد المغارب»؟

شخصيتي مختلفة عن اللي قدمته قبل كده، والمسلسل أحداثه حقيقية، عن خط الصعيد في الخمسينات والستينات، فأنا بعمل شخصية اسمها «علي جابر»، اللي هوكان واقف جمبه ومعاه قبل ما يتحول للإجرام.