عزة بهاء: عرفت بجوازة جوزي في جنازته.. ومش بلاقي نفسي في الوسط الفني

أثارت الفنانة عزة بهاء، جدلًا كبيرًا عبر مواقع التواصل الاجتماعي خلال الساعات الأخيرة، بعدما كشفت عن تعرضها للخيانة من قبل جوزها، ومعرفتها بخيانته أثناء جنازته، وذلك خلال حلقتها مع الإعلامية مروة صبري ببرنامجها «قعدة ستات».

ونرصد لكم في السطور التالية أبرز تصريحات عزة بهاء في برنامج «قعدة ستات»:

خيانة زوج عزة بهاء

أكدت الفنانة عز بهاء خلال لقائها مع الإعلامية مروة صبري، أنها تعرضت للخيانة من قبل زوجها الراحل، موضحة أنها اكتشفت خيانته بعد وفاته، قائلة: «أتجوزت 3 مرات مرات، لإني حظي وحش في الرجالة، ده أنا مرة كنت متجوزة وهو كان مسافر وعمل حادثة، وأنا مكنتش أعرف وقاعدة مستنياه يرجع.. واتفاجأت إن مامته بتكلمني وبتقولي إنه مات».

وأشارت إلى أنها أصيبت بصدمة عندما تلقت خبر وفاتها، قائلة: «نزلت جري عشان أتأكد بنفسي، وفعلًا لقيته في عربية الإسعاف ومعاه واحدة، أنا شوفتها من هنا واتجننت، واتصدمت بجد وفضلت أخبط على العربية وأقوله مين ديه، ومكنتش مستوعبة لسه».

وأضافت: «من كتر صدمتي وقت ما كنت في الجنازة بتاعته كان الموضوع ده شاغل تفكيري، وأول ما قابلت صاحبه وجه يواسيني سألته عن البنت اللي كانت مسافرة مع جوزي، واكتشفت بقى إنها مراته مش صاحبته، وإني كنت زوجة تانية، وهو أتجوز عليا التالتة من غير ما أعرف».

سر غيابها عن المهرجانات الفنية

كشفت الفنانة عزة بهاء عن سر غيابها عن المهرجانات الفنية، مؤكدة أنها ممثلة وليست موديل، قائلة: «عمركم شفتم عبلة كامل في مهرجان فني، كانوا زمان بيقدمولي دعاوي للمهرجانات الفنية، لكن غالبًا دلوقتي اتنسيت من كتر ما برفض لإني مبعملش شغل فهروح ليه».

وأوضحت أنها تفتقد أجواء التصوير، لكنها لديها عدم ذكاء اجتماعي، قائلة: «التصوير على الريد كاربت مطلوب وبيفكر الناس بالنجوم، عشان كده باجي مثلًا أجهز عشان أحضر، لكن بعد ما أخلص لبس واجي على أخر دقايق أقول لأ مش نازلة ماليش مزاج، ولكن أنا فاشلة في العلاقات العامة ومش بلاقي نفسي وسط الوسط الفني، ومش شبه الوسط الفني اللي موجود آخر ١٠ سنين».

كما كشفت عن سبب عدم ظهورها على الشاشة أو المشاركة في أي عمل فني، موضحة أنها تتلقى عروض لا تليق بها، ولا تستحق أن تنزل من منزلها حتى تصور مثل هذه الأدوار، قائلة: «لما اتخرجت كنت بشتغل مع الأستاذ عادل إمام وسمير صبري، وأول عمل ليا كان مع الأستاذة سناء جميل، وفضلت أشتغل وأقل أقل لحد ما بقى بيتعرض عليا شغل ميستحقش أنزل من بيتي عشانه».