«جبر ربنا».. نشوى مصطفى تُعلن مشاركتها في مسلسل «إمبراطورية ميم»

أعلنت الفنانة نشوى مصطفى، عن مشاركتها في مسلسل «إمبراطورية ميم» المقرر عرضه في الموسم الرمضاني 2024 والعمل من بطولة النجم خالد النبوي.

وكتبت «مصطفى» عبر حسابها الشخصي بموقع التواصل الاجتماعي «فيسبوك»: «تحويشة العشر سنين اللي فاتت اللي مشتغلتش فيهم آخرها جبر كبير، فرحانة إنى مخسرتش سنين عدت رغم قسوة إن الفنان ما يمارسش فنه، بس الحقيقة ومعرفش هتصدقوني ولا لأ، لما كان يتعرض عليا دور مش حاساه، كنت بعتذر، وأنا بتقطع بس كنت بقول حقي في المرحلة دي، واللي باقي من العمر إني أستمتع وأنا بعمل فن».

وأضافت: «إيه متعة أكبر من إني بإذن الله أكون واحدة من فريق عمل عظيم وراقي، نص محترم، إخراج واعي، إنتاج لشركة أعمالها ترند وخالد النبوي، أقصد الخالد النبوي، خالد اسمه لازم يسبقه ألف ولام، بغض النظر عن حضوره اللي ربنا صارفة له بزيادة، هو كمان ممثل هاند ميد، ممثل يعلى اي ممثل يقف قدامه، ممثل هاوى بيذاكر وبيعيش وبيحس بمنتهى اجتهاد الممثل الهاوي، بمنتهى الاحترافية، يا يا بختي حقيقي».

وتابعت: «بالمناسبة ده سادس عمل بإذن الله أمثل فيه مع خالد، الشاطر يقول أسماء الأعمال اللي اشتغلت فيها مع خالد، هقول اسم العمل الأول وكنا لسه طلبة فى المعهد، مسرحية البحر بيضحك ليه وللأسف متسجلتش، كلى ثقة في توفيق ربنا وكرمه بإذن الله دعواتكم أكون عند حسن ظن حضراتكم».