والدة أنس بدمياط لـ"الجمهور": لقيت ابني سايح في دمه وسائق التريللا هرب بعد دهسه

تداول رواد مواقع التواصل الاجتماعي مقطع فيديو صادما يوثق لحظة دهس طفل أسفل عجلات سيارة "تريللا" محملة بالأنابيب على طريق عزبة سبعة بمدينة الكاشف التابعة لمركز الزرقا بمحافظة دمياط، في واقعة تعود لتاريخ 19 أبريل الماضي، وأثارت موجة غضب واسعة.

ويظهر في الفيديو المتداول الطفل يسير بمفرده على جانب الطريق الواسع، قبل أن تظهر خلفه سيارة نقل ثقيل "تريللا" وتدهسه بشكل مباشر، ثم تتوقف في منتصف الطريق، حيث ترجل السائق لمعاينة الطفل، وبعد تأكده من وفاته فر هاربًا من موقع الحادث لإخفاء معالم جريمته.

التقت "الجمهور" بوالدة الطفل أنس، البالغ من العمر 10 سنوات، والتي روت تفاصيل اللحظات الأولى قائلة: "جالي الخبر من واحد من أصحابه، قالي أنس عربية داست عليه.. جريت أشوف لقيت ابني سايح في دمه على الأرض، قعدت أصوت وانهارت، لقيت ودنه مش موجودة وجنب وشه متكسر والجنب التاني سليم، وتوفى في ساعتها".

وأضافت الأم في تصريحات خاصة لـ"الجمهور" وهي في حالة انهيار شديد: "أثناء العزاء عرفنا إن السائق اتحاكم بسنة واحدة بس، وإحنا في ذهول.. إزاي سنة وهو أصلاً معهوش رخصة ومبيعرفش يسوق، ده آخره يسوق عربية بحصان".

وأكدت والدة أنس أن الفيديو غيّر مسار القضية بالكامل، موضحة: "في الأول قالولنا إن الطفل كان بيلعب بالعجلة، لكن الفيديو وضح إنه كان ماشي على جانب الطريق لوحده تمامًا وملوش أي علاقة بالسائق، واللي يشوف الفيديو يقول إن السائق دهسه متعمدًا.. الطريق كان واسع وكل واحد في ناحية".

وقال والد الطفل وهو في حالة انهيار شديد وغير قادر على الكلام: "أنا عايز حق ابني.. ابني ضاع بسبب سواق متهور معندوش رحمة ولا ضمير، ومفيش معاه رخصة وسايق كده بدون أدنى رخصة.. أنا عايز القصاص العادل في جلسة الاستئناف"، وطالبت أسرة الطفل بإعادة النظر في الحكم الصادر ضد السائق، مؤكدين أن الحكم "لا يتناسب مع بشاعة الجريمة"، خاصة بعد ظهور الفيديو الذي يكشف تعمد السائق وتعمده الهروب بعد التأكد من وفاة الطفل.