وائل جمعة: موقف إمام عاشور مؤسف.. والالتزام هو معنى اللعب في الأهلي
علّق وائل جمعة، نجم الأهلي السابق، على أزمة غياب إمام عاشور عن رحلة الفريق الأخيرة، مؤكدًا أن الموقف كان غير مُتمنّى، خاصة في ظل الدعم الكبير الذي يحظى به اللاعب من جماهير القلعة الحمراء خلال الفترة الماضية.
وقال وائل جمعة في تصريحات قوية:«موقف إمام مكنتش أتمنى يحصل، إمام لاعب كويس، والفترة اللي فاتت حظي بدعم وحب جماهير الأهلي، لكن واضح إن إمام لسه مش واصله يعني إيه تكون لاعب داخل الأهلي، وكل مرة نفس السلوك بيتكرر».
وأضاف نجم الأهلي السابق: «معنى إنك تكون لاعب في الأهلي إنك تحترم المكان اللي إنت فيه، إنت زيك زي أي لاعب، وقيمتك وتقديرك النادي هو اللي بيدهولك على حسب أدائك، بغضّ النظر عن أي سبب لغيابك عن الرحلة».
وأشاد جمعة بموقف إدارة النادي، قائلًا: «أنا سعيد جدًا بموقف النادي والعقوبة اللي اتخذت، لأنها بتأكد إن مفيش حد أكبر من الكيان».
كما عبّر عن رضاه باعتذار اللاعب، مؤكدًا: «سعيد باعتذار إمام، وده أمر مهم، وسعيد كمان بموقف جمهور الأهلي اللي دايمًا بيثبت إن مفيش عنده حد غالي أكتر من النادي».
واختتم وائل جمعة تصريحاته بالتأكيد على أن الانضباط والالتزام هما الأساس في نجاح أي لاعب داخل الأهلي، مشددًا على أن الحفاظ على اسم وقيمة النادي يجب أن يكون أولوية قصوى لأي لاعب يرتدي القميص الأحمر.
