عمرو السولية يكشف كواليس أصعب فتراته في الأهلي ويعلق على رحيل رمضان صبحي
تحدث عمرو السولية، نجم النادي الأهلي، عن أصعب مراحل بدايته داخل القلعة الحمراء، مؤكدًا أنه عانى كثيرًا قبل أن يثبت نفسه ويحجز مكانًا أساسيًا في التشكيل.
وقال السولية خلال ظهوره مع شادي حبشي في بودكاست "إحنا الإيجيبشن ليج": أول ما جيت الأهلي قعدت فترة طويلة مبشاركش، وأحيانًا كنت بسافر مع الفريق وأطلع برة القايمة. كنت باجي قبل التمرين بساعتين أتمرن في الجيم، وبعد التمرين كنت بتمرن تاني لو قادر، ولما مكنتش بلعب كنت باجتهد أكتر وبرضو مكملت، ومطلبتش إعارة ولا اتكلمت مع حد.
وأكد نجم الأهلي أن نقطة التحول جاءت بعد وصول حسام البدري لقيادة الفريق: لما كابتن حسام جه أخدت فرصة، ومن بعدها كملت أساسي.
وعلّق السولية على رحيل رمضان صبحي المفاجئ عن الأهلي، مؤكدًا أن القرار كان صادمًا للجميع داخل غرفة الملابس:
مكناش نتوقع إن رمضان يمشي من الأهلي. كانت مفاجأة لينا كلاعيبة، لأنه ابن النادي والفرقة كانت قايمة عليه، وهو كان المستقبل، الناس كانت شايفاه حاجة كبيرة وممكن يوصل لأكبر.
وأضاف: اللي زعلني إنه كان عنده فرصة يحترف تاني. أنا بحب رمضان جدًا وهو لاعب جامد، وكنت أتمنى يكمل معانا أو يحترف، لأن إمكانياته كانت تخليه يكسر الدنيا برة.
وتعكس تصريحات السولية جانبًا مهمًا من رحلته داخل الأهلي، بالإضافة إلى رؤيته لملف رحيل رمضان صبحي الذي مازال يثير الجدل بين جماهير الكرة المصرية.
