استغاثة فتاة: أب يزرع الرعب بدلاً من الأمان.. والضحية 5 أطفال| فيديو

في الوقت الذي يُفترض فيه أن يكون الأب مصدر الأمان والسند الأول لأبنائه، يظهر جانب مظلم ومؤلم حين يتحول هذا الدور إلى تهديد دائم لحياة الأبناء، فالأب ليس فقط من ينفق على أسرته، بل هو من يربّي ويحتوي، وهو من يزرع الطمأنينة لا الخوف، ومن يربي بيده لا يبطش بها.

فتاة تستغيث بالحكومة

لكن ما حدث في هذه القصة المؤلمة، التي وثّقتها استغاثة مصوّرة مؤلمة لفتاة، يعد نموذجاً صادماً لانهيار هذا المعنى، ويكشف حجم المعاناة التي يمكن أن تُخفى خلف جدران المنازل، بعيداً عن أعين القانون.

استغاثة فتاة

وجاء نص الاستغاثة كما روت الفتاة عبر صفجتها على موقع التواصل الاجتماعي «فيس بوك»:

"السلام عليكم ورحمة الله وبركاته. أنا بستغيث بأي حد في البلد اللي المفروض فيها قانون يجيب حق أي حد ليه حق. المفروض إن اللي في الفيديو ده أَبُويا اللي المفروض يحمينا هو هو اللي بيموت فينا بقالنا سنتين على الحال .قبل الضرب ده ف الاول قفل علينا الشقة الساعة 3 فجرآ وبيقول لازم حد فينا يخلص على التانى لازم حد يموت النهارده وبدايه المشكلة المره دى كان حبسنا كلنا فى الاوضه وممنوع حد يطلع حتى للحمام ماما بس طلعت للحمام وهنا كانت البداية، لا حد عارف يدخل ولا حد عارف يسكته. وطبعًا من سنتين ضرب وإهانة وتكسير لينا ولماما.

إحنا خمس أخوات من ضمنهم طفلين لو قدرت احمى نفسي غصب عني مش قادره احميهم ،لو الجيران ال ف الشارع مكنوش كسرو الباب ودخلو خلصونا من ايده كان موتنا و الجيران لحقونا النهارده الله اعلم المره الجايه هيلحقونا امتى حضرته مش متحمل اى مسؤوليه عننا كلنا وده طبعا مش كفاية بالنسبة له ، لازم يكسر فينا كل يوم بطريقة مختلفه، فينا ومحدش يسألني سبب كل ده إيه. ممكن تسألوه لأن إحنا عجزنا إننا نعرف السبب أو ذنبنا إيه أصلاً في كل ده. وطبعًا ده مشكلة واحده فقط من ضمن المشاكل اللي بتحصل كل يوم عادي ولا جيران قادرين يمنعوه ولا اهل ولا غيره بس فيه حكومة فى البلد . طبعا إحنا لا عارفين ناخد حقنا ولا حد قادر يسكته ولا بيسكت أصلا.

وطبعًا بعد الفيديو ده كلكم عارفين لو تليفوني اتقفل يبقى مين، ولو حصل لي حاجة أنا وإخواتي يبقى مين ومن 2023 وإحنا رافعين قضايا وأرقام المحاضر موثقة بالتواريخ لله الحق والمنتقم الجبار.

أتمنى حد يسمع ندائي، أتمنى حد يقدر يمنعه من إيذائنا، أتمنى نقدر نتنفس بس. يسمح لينا إننا نتنفس مش أكتر من كده، بس نقدر نتنفس بأمان وننام ساعة واحدة بأمان من غير خوف. إحنا مش في غابة، وأنا ليّ صوت ولازم يتسمع، لازم حد يسمعنا.

واي حد يعرفني ولو معرفة بسيطة بس هيعرف انى وصلت للحل ده بعد قد أيه وأي حد عايز يساعدني ميسألش عن تفاصيل يشير البوست عشان صوتي يتسمع لاكبر عدد من الناس لو صوتي متسمعش الموضوع هينتهي بموت حد فينا وساعتها مش هسامح اي حد يقدر يساعد واختار انه يتفرج وشكرا".