خدت طليقي مني.. نص اعترافات المتهمة بتشويه وجه عروسة مصر القديمة
قضية أثارت الجدل بين جيران عزبة خير الله في مصر القديمة، حيث نشبت مشاجرة بين مريم ومنصورة نتيجة لخلافات متصاعدة، تعرضت بعدها مريم للقبض عليها بعد اتهامات بتشويه وجه منصورة عروسة مصر القديمة جراء خلافات بينهما.
اعترافات المتهمة بتشويه وجه عروسة مصر القديمة
في بداية التحقيقات، أكدت مريم أنها تعرف منصورة عروسة مصر القديمة وأسرتها منذ فترة طويلة، حيث كانت جيرانا لها في عزبة خير الله، وكانت تتبادل الزيارات مع العائلة في الأفراح والمناسبات الاجتماعية لكنها تفاجأت في فبراير الماضي عندما حدث الطلاق بينها وبين زوجها، ليبدأ فصل جديد من الخلافات العائلية.
مريم تروي بداية الأزمة بقولها: "منصورة نزلت منشور على فيس بوك منذ 10 أيام تقريبا، تقول فيه إن فرحها مع طليقي سيكون يوم 24 سبتمبر، فقررت أن أذهب وأهنئها، لكنني فوجئت بردها السيء، حيث قامت بشتمي وقالت لي: "أنت مش كويسة وشمال عشان كده طلقك وهو ما أثار غضبي بشدة"، وقمت بالتواصل مع مصطفى خطيب ابنة عمتها وأخبرته بأن منصورة شتمتني وبعدها روحت لها تحت البيت وعورتها في وشها.
أقوال عروسة مصر القديمة
قالت عروسة مصر القديمة أمام جهات التحقيق في القاهرة، اللي حصل إن مريم ساكنة عندنا في عزبة خير الله ومكش بينا كلام تماما واتقابلنا مرة واحدة في فرح من شهرين ومش معايا رقمها ولا معاها رقمي وأنا أعرف إنها اطلقت من شهور من أحمد، وكنت أعرف أحمد من بعيد لبعيد قابلته يوم السبت ۲۰۲۵/۸/۲۳ وطلب مني رقمي عشان عاوزني في موضوع واتصل عليا وقالي إنه عاوز يكتب عليا آخر شهر 9، وإنه داخل جمعية وجاهز وكده وأنا وافقت وحطيت صورة على فيسبوك إن كتب كتابي يوم 2025/9/20 على أحمد.
وأضافت عروسة مصر القديمة، راحت مريم دخلت علقت وقالتلي ألف مبروك ابقي اعزميني وحطت صور تريقة رحت انا رديت عليها قلتلها الله يبارك فيكي ودخلتلها على الخاص وقلتلها معلش انت تنوري في أي وقت بس مينفعش تيحي عشان الدنيا على الضيق وانا مضطرة اعملك حظر عشان أحمد اللي قالي، وأحمد جابلي رقم جديد مكان رقمي، وبعد كده هي كلمت أحمد وأخذت منه رقم مصطفى خطيب ندى بنت عمتي عشان توصلنا وکلمت مصطفى قالتله إني شتمتها وإنها عاوزة حقها، راح مصطفي قالها خلاص تعالي واحنا هنحلها وراح مصطفي قفل وکلم ندى قالها راحت ندى بعتلها قالتلها ملكيش دعوة بخطيبي وقعدو يشدو مع بعض.
القصة الكاملة لـ جريمة تشويه وجه منصورة عروسة مصر القديمة
وأضافت عروسة مصر القديمة، راحت مريم ردت عليها وقالتها اصبري أنا جايلك بعد نص ساعة وهوريكي أنا هعمل ايه وجت فعلا مع مصطفى، راحت ندى شداها بعيد عنه راحت مریم قعدت تزعق وتقول كلام كتير وحش علينا أنا وعيلتي وانا كنت ببعد وعمتي كانت رايحلها فجأ لقيت خبطة جت في وشي ومريم بتجري بعيد عني وبحسس على وشي لقيت خدي مفتوح والناس في الشارع شافوها وقالوا إن مريم عورتني راحت مريم جريت تداري في الرجالة اللي مشفوش حاجة وأنا أغم عليا وفقت لقيت نفسي في قسم مصر القديمة، وحولوني على قصر العيني.
بدأت القصة حين ارتبطت منصورة فتاة مصر القديمة بخطبة لرجل منفصل عن زوجته السابقة، لتتحول حياتها إلى جحيم، وسردت منصورة تفاصيل الحادث قائلة: "كان متقدم لي عريس منفصل، وزوجته الأولى كانت بترن عليه وتهدده، وقالت له لو خدت منصورة هحبسك وهندمك عليها".
تفاصيل التعدي على منصورة فتاة مصر القديمة
بعد ارتكاب الجريمة، هربت المتهمة من مكان الحادث في مصر القديمة وتم نقل الفتاة المجني عليها للمستشفى، ما أثار حالة من الفزع بين الأهالي، وظلت متوارية عن الأنظار لفترة قبل القبض عليها.
منصورة لم تفقد فقط ملامح وجهها الطبيعية، بل فقدت شعورها بالأمان والثقة في المجتمع، إذ ترك الاعتداء ندوبا عميقة في وجهها، كما أصبحت بحاجة إلى عمليات تجميل وعلاج نفسي طويل الأمد.
فتاة مصر القديمة: عايزة حقي
وقالت منصورة فتاة مصر القديمة "أنا عايزة حقي هي مش بس شوهتني، هي بتحاول تبرر اللي عملته وتنكر تخيلوا أنها بتنزل بوستات على السوشيال تتفاخر إنها عملت فيا كده!".
هذه التصريحات أثارت موجة تضامن كبيرة مع الفتاة، إذ أطلق ناشطون منشورات على منصات التواصل تطالب بمحاسبة المتهمة، وتقديم الدعم الطبي والنفسي للضحية.
إنكار الجريمة والتباهي على مواقع التواصل
أكثر ما أثار الجدل في هذه القضية هو تصرف المتهمة عقب الواقعة، إذ أنكرت ما ارتكبته رغم وجود شهود، وأفادت منصورة أن بعضهم يشهد لصالحها زورا، وذكرت الضحية أن المعتدية: "كانت بتنزل بوستات على الفيسبوك والسوشيال ميديا، وبتقول إنها علمت عليا، وده خلاني أخاف أكتر على نفسي".
فيما أكد مصدر أمني بمديرية أمن القاهرة، أنه تم تحرير محضر رسمي بالواقعة، وتولت أجهزة البحث الجنائي جمع التحريات، حيث جرى الاستماع إلى شهادة الضحية وعدد من الشهود، وتم تحديد هوية المتهمة ورصد تحركاتها.
ضبط المتهمة بتشويه وجه فتاة مصر القديمة
ألقت الأجهزة الأمنية القبض عليها تمهيدا لعرضها على النيابة العامة حيث أشار المصدر إلى أن الواقعة تخضع لفحص موسع للتأكد من الدوافع الجنائية وتوثيق الأدلة، وأن العقوبة قد تصل إلى السجن المشدد بتهمة الشروع في القتل والتشويه العمد.