أحمد بلال: رتم الدوري ضعيف.. وهذه إمكانية تواجد "شيشة" في معسكر الأهلي

أكد أحمد بلال، نجم الأهلي والكرة المصرية السابق، على أن مستوى الدوري المصري في نسخته الحالية، ضعيف للغاية، وأن أكثر من يجري في الملعب حاليًا هو الحكم، في إشارة لبطء الرتم وانخفاض جودة الأداء.

وقال بلال خلال تصريحاته ببرنامج "بلس 90" على قناة النهار: "الإسماعيلي بيعاني من أزمة كبيرة، خصوصًا مع فقر العناصر المتاحة، أغلب اللاعيبة صغيرة في السن، وجودة الفريق تراجعت بشكل واضح".

وتابع: "زمان الإسماعيلي كان بينافس على البطولات، النهاردة كل هدفه يبقى مجرد البقاء في الدوري، ومش سهل تقييم اللاعبين الموجودين حاليًا، ورغم إن زمان النادي ماكنش معاه فلوس، لكنه كان مليان مواهب".

وأشار أحمد بلال إلى أن مفهوم الاستثمار الرياضي تم فهمه بشكل خاطئ، قائلاً: "الاستثمار الحقيقي هو إن رجل الأعمال يشتري أسهم في نادي قائم، لكن اللي بنشوفه دلوقتي ناس بتشتري أو تنشئ أندية من غير جمهور، ويقولوا ده استثمار!".

 "مستحيل تشوف شيشة أو سجاير في معسكر الأهلي"

ونفى بلال بشكل قاطع وجود أي مظاهر غير احترافية داخل معسكرات الأهلي، مضيفًا: "عُمري ما شفت شيشة أو سجاير في معسكرات النادي الأهلي، وعمري ما سمعت عن لاعب بيشرب، وأنا كنت قائد الفريق، ولو في حاجة زي كده كنت هعرف".

وشدد: "لو حصلت حاجة زي دي، إدارة الأهلي هتتصرف فورًا، ومفيش لاعب أكبر من النادي، ومينفعش المواضيع دي تتقال في الإعلام لأن فيها ظلم لناس كتير تواجدت في الفترات دي".

واختتم أحمد بلال تصريحاته بالحديث عن خسارة الزمالك لنهائي دوري أبطال إفريقيا 2016، قائلاً: "السبب الرئيسي كان ضعف الإسكواد، وفريق صنداونز وقتها كان من أقوى الفرق في القارة، وضم لاعبين مميزين جدًا".