أول تعليق من محمد بركات على انتقال زيزو إلى الأهلي

أشاد محمد بركات، نجم النادي الأهلي ومنتخب مصر السابق، بالوافد الجديد إلى صفوف الفريق الأحمر أحمد مصطفى زيزو، مؤكدًا ثقته الكاملة في قدرته على تحقيق النجاح داخل القلعة الحمراء رغم الضغوط والتحديات.

زيزو يمتلك عقلية احترافية وشخصية ملتزمة

وتحدث بركات في تصريحات عبر قناة MBC مصر 2،عن رؤيته الشخصية للاعب، قائلًا: "أنا تعاملت مع زيزو عن قرب، سواء في فترة تواجدي كمدير للمنتخب الأول، أو أثناء الإعداد لأولمبياد باريس، هو من نوعية اللاعبين اللي عندهم وعي كبير، دايمًا بيشتغل على نفسه، وعنده رغبة قوية إنه يبقى أفضل. حتى لو كسب مباراة وكان مستواه مش على المستوى المطلوب، بيحاسب نفسه قبل أي حد".

انضباط داخل وخارج الملعب

وأضاف بركات أن زيزو يتمتع بانضباط واضح في كل تفاصيل حياته: "حتى في الأمور البسيطة زي الأكل والنوم، زيزو عارف إيه اللي يفيده وإيه اللي ممكن يضره، لما انضم للمنتخب، دخل وسط زملائه بدون أي استعلاء أو إحساس إنه نجم. بالعكس، كان ملتزم جدًا، وبيتعامل بكل احترام".

طموحات كبيرة مع الأهلي

وأشار بركات إلى أن زيزو لديه أهداف واضحة مع الفريق الأحمر، قائلًا: "هو مش جاي علشان يكون مجرد لاعب في الأهلي، زيزو عايز يبني تاريخ وياخد بطولات، عايز يحقق دوري أبطال أفريقيا بانتظام، ويكون جزء من فريق يشارك في كأس العالم للأندية باستمرار".

يتجاوز الضغوط ويملك شخصية متزنة

واختتم بركات حديثه مؤكدًا أن زيزو يملك شخصية تساعده على التأقلم سريعًا: "أنا رأيي الشخصي إنه هينجح مع الأهلي بشكل كبير، هو مش من النوع اللي بيتأثر بالضغوط، بالعكس، بيشتغل في صمت وبيخلي تركيزه دايمًا في الكرة. اللي مر بيه مؤخرًا كان صعب، لكن شخصيته القوية هتخليه يعدي كل ده بسرعة".

زيزو انضم مؤخرًا إلى صفوف الأهلي وسط حالة من الجدل والاهتمام الجماهيري والإعلامي، إلا أن كل المؤشرات تدل على أنه يمتلك من الإمكانيات الفنية والشخصية ما يساعده على التألق في واحدة من أصعب محطات مسيرته الكروية.