إمام عاشور: «جايين ناخد كأس العالم.. إحنا زيهم وهدفنا اللقب»

أطلق إمام عاشور، لاعب وسط الأهلي، تصريحات ناريةخلال ظهوره مع الإعلامي سيف زاهر عبر قناة "أون سبورت"، مؤكدًا أن الفريق يخوض بطولة كأس العالم للأندية 2025 بهدف واضح، وهو تحقيق اللقب، مشددًا على أن الأهلي لا يقل عن أي نادٍ مشارك في البطولة.

قال عاشور بثقة : «ناخد كأس العالم.. إيه المشكلة؟ هما لعيبة كورة وإحنا لعيبة كورة. زي ما هما 11 لاعب، إحنا كمان 11، وزي ما عندهم نجوم، إحنا عندنا نجوم، وعندنا اسم وتاريخ».

وتابع مؤكدا: «إحنا جايين نكسب.. من أول يوم اللاعيبة كلها مركزة، وماتش باتشوكا الودي اعتبرناه كأنه في البطولة. من أول ما وصلنا وإحنا شغالين عشان نكسب كل الماتشات».

اتعلمت من غلطاتي.. وبقيت أنضج

وتحدث عاشور عن تطوره الشخصي مؤخرًا، قائلا: «في أوقات كتير غلطت فيها، لكن الواحد بيتعلم وبينضج. اتغيرت عشان عيلتي وعشان أكون أفضل، اتحطيت في مواقف تخليني أبطل كورة، لكن ركزت في التمرين والماتشات، وسيبت الناس تتكلم براحتها».

فيما أثار حديثه عن احتفال "البالونة" تفاعلا كبيرا، حيث أوضح: «ليه أندم عليه؟ ده احتفال عادي، ومش عاملها لحد. وممكن أعمله مرة واتنين، ومش لازم أشرح لكل واحد إني مش أقصد كذا وكذا».

أنا ودونجا إخوات.. واللي بيحصل في الملعب بيخلص بعده

أكد إمام أن الخلافات داخل الملعب لا تدوم، قائلًا: «أنا ودونجا دلوقتي إخوات وبنتكلم دايمًا، بنخرج سوا، واللي حصل بينا كان شدة في الملعب وخلص».

يذكر أن الأهلي يستهل مشواره في بطولة كأس العالم للأندية 2025 يوم 14 يونيو الجاري أمام إنتر ميامي الأمريكي، ضمن المجموعة الأولى التي تضم كذلك بورتو البرتغالي وبالميراس البرازيلي.