مخرجة "ريستارت" ترد على طارق الشناوي بعد وصفه للفيلم بأنه فارغ
ردت المخرجة سارة وفيق، على الناقد الفني طارق الشناوي، تدافع عن فيلمها "ريستارت"، بطولة تامر حسني وهنا الزاهد، بعد أن انتقده الأخير، مشيراً إلى أن الفيلم لا يحتوي على موضوع.
وقالت سارة وفيق في منشور لها عبر حسابها الشخصي على فيسبوك: أستاذ طارق الشناوي في فرق كبير بين الإهانه وبين النقد، حضرتك بتقول إن مفيش موضوع في الفيلم ودي حاجة ضحكتني جدا لأن احنا بنتكلم عن موضوع الساعة موضوع العصر أكبر موضوع بيهمنا ويخصنا حاليًا.
وأضافت: كلامك فكرني بمشهد في الفيلم للفنان محمد ثروت وهوه بيقول أنا أعمل اي حاجه عشان أبقي تريند "احنا خدامين التريند"، وسمع كلام الچوكر "الفنان باسم سمره" اللي بيشتغل لأغراض ناس، مبروك يا أستاذ طارق عرفت تبقي تريند من غير ما تنقد الفيلم.. تخبط في القائمين على العمل بعيد عن العمل نفسه ولا اتكلمت عن إيجابياته ولا سلبياته.
وألمحت: لا ههاجم أشخاص وبكده هطلع تريند بسرعة، ده موضوع الفيلم اللي انت مافهمتوش أصلا ولا هو جالك ع الجرح؟؟، وعلى فكرة أنا كمان بعرف أعمل تريند وهنطلع تريند أنا وانت، بس أنا على حق وهمنشنك عشان تظهر بسرعة.
وتابعت: انت بتقول إن أغنية المقص عجبتك بس هي مش داخل الفيلم لا يا أستاذ طارق الأغنية في الفيلم بس شكل اللي بيمليك اتلخبط، أدخل شوف الفيلم اللي انت مشوفتوش واحكم عليه بنفسك وبلاش الأفكار السطحية اللي بتقولها على كل الأفلام لأنك لو شوفت ريستارت فعلاً كنت هتعرف أن قصته أهم ما فيه.
وأوضحت: وبعدين حضرتك بتتكلم عن أدوات المخرج والمؤلف ولم تستخدم أدواتك كناقد فني ياريتك قولت حاجة نستفيد بيها بدال مانت طالع ترمي إفيهات وإفيهات وحشه كمان، الرقم اللي متحقق جوه مصر وبرا مش مجاملة يا أستاذ طارق ده الجمهور الحقيقي اللي بنخاطبه دول مش ولاد أختي مثلاً.
واختتمت: الفيلم لسه نازل وداخل على خمسين مليون داخل مصر فقط ودا نجاح مفرح كل صناعه الحمد لله، على العموم دي كلمتك ورأيك والجمهور قال كلمته برضو.
